Рет қаралды 46,540
O Azərbaycan sevgisi ilə yaşayan sənətkar idi. Bir nəslin qəlbində, yaddaşında əbədi yaşayacaq sənətkar. Biri var idi. Səsi, sənəti, savadı, duruşu, tərzi ilə sevilən Aygün Bəylər.
Aygün Aydın qızı Hümmətova 22 avqust 1975-ci ildə Bakıda çoxuşaqlı ailədə anadan olub. Beş uşaqlı ailənin ilk övladı olan Aygünün anası işlədiyi üçün digər uşaqları hər gün Aygünə etibar edib işə gedirmiş. Aygün ailəsinin qayğılarına o qədər aludə olub ki, orta məktəb təhsilini belə düz-əməlli ala bilməyib.
ilkin musiqi təhsilini Səttar Bəhlulzadə adına Mədəniyyət Sarayının musiqi məktəbində nağara sinfi üzrə alıb. 1988-ci ildə 13 yaşlı Aygün Azərbaycan Dövlət Uşaq Filarmoniyasına qəbul olunub. Professional səhnəyə ilk gəlişi də elə bu dövrə təsadüf edir.
Ancaq atasının ciddi etirazı ilə qarşılaşan Aygün müğənni olmaq üçün evdən qaçmaq məcburiyyətində qalıb. O, müsahibələrinin birində deyib:
"15 yaşımdan tək yaşayıram. Evə getmək olmazdı. Qorxumdan evdən qaçmışdım, çünki toyda oxuduğum üçün atam məni öldürəcəkdi. Rəfiqəm Elnarənin evində qalırdım. 15-16 yaşımdan tək ev tutub yaşadım. Anam 180 rubl maaş alırdı. Mən isə bir toydan 100 rubl qazandım. Gördüm ki, toylarda yaxşı gəlir var. Bibimin həyat yoldaşının dəstəyi ilə oxudum. Atama tez-tez deyirdi ki, qoy oxusun. Əmim isə məni öldürmək istəyirdi ki, niyə oxuyur?”.
1998-ci ildə Azərbaycan Milli Konservatoriyasının xanəndəlik fakültəsinə daxil olan Aygünün sənət taleyində yeni səhifə açılıb. Görkəmli sənətkarlar - Arif Babayev, İslam Rzayev, Ağaxan Abdullayev, Elxan Müzəffərov, eləcə də Alim Qasımovdan muğamın incəliklərini öyrənib.
2002-ci ildə Aygün Bəylər “Əməkdar artist” fəxri adına layiq görülüb. Həmin ərəfədə atası ağır xəstəlikdən əziyyət çəkir, ömrünün son günlərini yaşayırmış. O, qızının fəxri ad almağını eşidib sevinib. Bu barədə xanəndə müsahibələrinin birində deyib:
“2003-cü ildə atam xəstə idi, ömrünün son günlərini yaşayırdı. Həmin vaxt fəxri ad aldım. Necə sevinirdi... Atam ölüm ayağında dedi ki, "Məni bağışla, sənə əziyyət vermişəm. Səni düz tanımamışam. Mənim oğlum elə sən imişsən. Səninlə fəxr edirəm". Atamdan halallıq aldım. Mənə çox əziyyət verib, oxuduğum üçün evə buraxmırdı. Hamı atamın məni bağışladığına şahid oldu”.
2018-ci ilin iyul ayında uzun sürən xəstəlikdən əziyyət çəkən Aygünün anası dünyasını dəyişib. Sənətçinin müğənni kimi fəaliyyət göstərən bacısı Zümrüd müsahibələrinin birində anası ilə bacısı haqqında deyib:
“Anam Aygünün muğam ifa etdiyini görəndə çox ağlayırdı. O, Aygünü dəhşətli dərəcədə çox istəyirdi. On beş yaşlı qıza ailə dəstək olmalı idi. Amma anamın əlindən heç nə gəlmirdi. Aygün hamımıza kömək edirdi”.
Əməkdar artist “Sən ruhumun qida yerisən”, “Tut ağacım”, “Küsmə gəl”, “Qəlbimin səsi”, “Özün günahkarsan” mahnıları ilə məşhurluq qazanıb. Ancaq ona ən böyük uğuru “Tut ağacım” mahnısı gətirib.
Bir neçə il əvvəl isə Aygün həmkarı Röya Ayxan haqqında səsləndirdiyi "Röya hansı sənətlə gəlib, onun kimilər çoxdur" fikirlərinə görə Röya tərəfindən məhkəməyə verilib. Röya Aygünü onun şərəf və ləyaqətini təhqir etməkdə günahlandıraraq ondan 50 min manat təzminat tələb edib. Ancaq Aygün keçirilən məhkəmələrə gəlməyib. Məhkəmə Röyanın iddiasını rədd edib.
2020-ci ildə isə müğənni Moskvada keçirilən konsertlərin birində erməni müğənni İlona Nersesova ilə qucaqlaşıb duet oxuduğu üçün sosial şəbəkə istifadəçilər tərəfindən “linç” edilib.
Aygün Bəylər bir dəfə qeyri-rəsmi nikahda olub, onun Canan adlı qızı var.
Bir müddət əvvəl Aygünün xərçəng xəstəliyindən əziyyət çəkməsi barədə mətbuatda xəbərlər yayılıb. Müğənni özü də bu fikirləri təsdiq edib və müalicə aldığını deyib. Ötən ilin dekabr ayında isə onun tam sağaldığı və həkim nəzarətində olması barədə məlumat yayılıb.
Mügənni 2002-ci ildə “əməkdar artist” fəxri adına layiq görülüb. 2005-ci ildə Özbəkistanın Səmərqənd şəhərində keçirilən beynəlxalq folklor festivalında birinci mükafata layiq görülüb. Fransa, İspaniya, Mərakeş, ABŞ, İngiltərə, Rusiya, Türkiyə, Yunanıstan, Hollandiya, Almaniya, Cənubi Koreya, İsveç, Danimarka və s. ölkələrdə solo konsertlər verib. həmçinin “Qış nağılı. I film” , “Qış Nağılı. II film” və “Bakı bağları. Buzovna” filmlərində çəkilib. Qısa ömür tarixçəsinə saysız uğurlar yazdırıb. Amma əcəl onu haqqlamağı bacarıb. Belə ki, 6 yanvar 2024-cü ildə əməkdar artist Aygün Bəylər Ankara şəhərində vəfat edib.
Sənətkar!
Azərbaycan sevgisi, sənət sevgisi ilə yaşayan sənətkar. Bizim nəslin qəlbində, yaddaşında əbədi yaşayacaq sənətkar.
Səsi, sənəti, savadı, duruşu, tərzi, sevgisi ilə xalqı, dövləti təmsil edəcək sənətkar,
Azərbaycanın Xalq Sənətkarı, yerin behişt olsun…