Рет қаралды 140,573
Жамбыл облысында жасөспірімдердің жауыздықпен жасаған қылмысы жұрт жағасын ұстатты. Бір топ бозбала 19 жастағы Алмас Әміровті 19 жерінен пышақтап өлтірді деген күдікке ілінді. Алайда қанды оқиға бойынша тек бір ғана адам қамауға алынды. Ал қолын қанға бояған тағы бірнеше жеткіншек әлі күнге бостандықта жүр дейді марқұмның туыстары. Айтуларынша, айуандықпен адам өлтіргендердің әрекеті бейнетаспаға түсіп қалғанымен, тергеушілер қылмыстық іс қозғалған бапты өзгертуге құлықсыз деп отыр.
Жаңа жыл түніндегі жантүршігерлік қылмыс осы сауда үйінің алдында болған. Мына бейнетаспадан төрт адамның көліктен түскені көрінеді. Кәмелет жасына жетпеген жасөспірімнің көлік жүргізуге құқығы жоғы өз алдына, суық қаруын сайлап күн бұрын тасаға тығып жатқаны байқалады дейді марқұмның туыстары. Кейін келесі көліктен Алмастың келгені көрінеді. Еш нәрседен күдіктенбеген Алмас алаңсыз төрт жігіттің артынан ере барады. Бірақ сол тасадан қайта шықпай қалған.
ДИДАР ӘМІРОВ, Марқұмның туыс ағасы:
- Баяғы қызы болған ғой сол. Қызғаныш па деп ойлап отырмыз. Біз 99 баптың, 2-ші тармағы, 7-ші тармақшасына сәйкес іс жүргізуін сұраймыз. Себебі бұл жерде алдын ала дайындалып, групповой болғаны анық көрініп тұр. Бір адамды қамаған, қалғанын босатып жіберген.
Марқұмның жақындары жеткіншектердің суық қару сілтеуіне сезімнің күші себеп екеніне сенімді. Алмастың бұрынғы қызы өзге жігіттер мазасын алғанын айтып шағымданған. Махаббат мәселесін шешу үшін қылмыс жасаған топ Алматыда жүрген Алмасты Меркіге шақыртқан. Бұл жайтты марқұмның телефонында қалған аудио жазбаларынан аңғардық дейді туыстары. Ал қолын қанға бояды деген басты күдікті марқұмның туған қарындасының сыныптасы екен. Ағасының денесіндегі жарақатын көрген ол, бұл жалғыз пышақтың ізі емес дейді.
ЛАУРА ӘМІР, Марқұмның қарындасы:
- Кәдімгідей бір шұңқыр сияқты болып тұр, ол пышақтың ізіне келмейді, Біздің пайымдауымызша ол жерде бір пышақпен істеген жоқ деп тұрмыз және оны бір адам істеген жоқ деп тұрмыз. + Бұл балалар мектеп кезінен бұзақы болатын. Осы Әділет деген бала туралы айтып тұрмын.
Үйінің үлкені Алмас спорт шебері болған. Іні-қарындастарына қамқор еді дейді жақындары. Қапыда қаза тапқан ол осы айда шаңырақ құруға дайындалып жүрген. Бірақ бұзақылардың кесірінен жас өмірі қиылды. Күдікті деген төрт адамның тек біреуі ғана қазір қамауда. Қалғаны қолхатпен бостандыққа жіберілген.
АЛМАС САЛАМАТОВ, Жамбыл облысы Полиция департаменті бастығының орынбасары:
- Қазіргі уақытта тергеумен қылмыс жасалар алдында орын алған жанжалдың барлық қатысушылары анықталды. Жиналған дәлелдемелер негізінде пышақпен бірнеше рет ұрған 17 жастағы күдікті анықталып, ұсталды. Ол уақытша ұстау изоляторына қамаққа алынды. Басқа қатысушылардың әрекетіне тергеу барысында құқықтық баға берілетін болады.
Осылайша тәртіп сақшылары қозғалған істің бабын өзгерту тек құқықтық бағадан соң ғана мүмкін екенін айтады. Дәлелденсе ешкім жазадан құтылмайтынына сендірді. Туыстары енді екі аптадан кейін шығатын сараптама қорытындысын күтпек. Бұл күн Алмастың белгілеп қойған беташар күні еді.
Бізді әлеуметтік желіде оқыңыздар:
KZbin - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал