2017-11-15 黎明拍片撐開紅館騷，衛蘭興奮嗌OMG

衛蘭（Janice）今日現身灣仔，為嚟緊一月舉行嘅紅館演唱會舉行記者會，前老闆黎明（Leon）、雷頌德（Mark）、鄭秀文同容祖兒等更拍短片向Janice打氣，當見到黎明嘅短片出現時，Janice更驚喜到大叫：「Oh my god！」
Janice話事前完全冇諗過Leon同Mark會拍片：「真係超級感動！之前完全唔知，好希望佢哋到時嚟睇，我遲啲都會親自打電話同佢哋講。」
咁到時會唔會邀請Leon上台？Janice話：「應該唔會喇，佢嚟睇已經好好，而且演出嘉賓亦都定咗。」但係嘉賓名單，Janice表示要保持神秘，只透露三晚都唔同而且係未曾合作過。