25-с өрөспүүбүлүкэтээҕи "Туос мааскы" театральнай бэстибээл бастакы күнүн түмүгүнэн тэттик видео

Өрөспүүбүлүкэтээҕи аһаҕас “Туос Мааскы” театральнай бэстибээл быйыл 25-с төгүлүн ыытыллар уонна Арассыыйаҕа биллэриллибит дьиэ кэргэн, Саха Өрөспүүбүлүкэтигэр - Оҕо саас, Майа сэлиэнньэтигэр - чөл олох сылларыгар ананна. Өссө биир кэрэхсэбиллээх түгэн - Саха Өрөспүүбүлүкэтин култуураҕа уонна духуобунай сайдыыга миниистирэ Афанасий Иванович Ноев бу сылы оҕо театральнай искусствотын сылынан биллэрбитэ. Дойдубут бэрэсидьиэнэ Владимир Владимирович Путин сорудаҕынан 2022 сыллаахха Российскай Федерация үөрэҕин министерствота хас оскуола аайы театральнай кэлэктиип тэрийии туһунан сыал-сорук туруорбута. Үүнэр көлүөнэ театр эйгэтигэр сыстан кэрэни кэрэхсиир, айар-тутар дьоҕурдаах, сырдыкка дьулуһар буола улаатара саарбахтаммат.
25-с өрөспүүбүлүкэтээҕи “Туос Мааскы” театральнай бэстибээл тэрийээччилэринэн буолаллар СӨ култуураҕа уонна духуобунай сайдыыга министерствота, өрөспүүбүлүкэтээҕи социальнай-культурнай технологиялар уонна норуот айымньытын дьиэтэ, Мэҥэ Хаҥалас улууһун үөрэҕин салалтата, Мэҥэ Хаҥалас улууһун култуураҕа уонна духуобунай сайдыыга салалтата, Дмитрий Федорович Ходулов аатынан Норуот айымньытын дьиэтэ, Дмитрий Ходулов аатынан Майатааҕа народнай театр уонна Майатааҕы народнай Эдэр көрөөччү театра!