Рет қаралды 34,514
Жаңөзендегі ереуілдер тоқтаған жоқ. Жалақының көтерілуін талап еткен ұжымдар саны көбейіп жатыр. Еңбекақының жоғарылауын сұрап бас көтергендердің кейбірі "бізді жұмыстан шығарып та жіберді" дейді. Десе де жұмысшылар айтқандарынан қайтпай, өз компания ғимараттарының алдына шатыр құрып наразылық білдіруін тоқтатпады. Жаңаөзенге арнайы барған әріптесім Махаббат Нұржанқызы ереуілшілердің жағдайын біліп қайтты.
Жаңаөзенде тек мұнай саласының ғана емес, өзге де саланың жұмысшылары бас көтере бастады. Олардың кәсіптері түрлі болғанымен, негізгі талабы - бір: жалақыны көтерту. Мәселен айдың барлық күнінде демалыссыз жұмыс істейтін Бөлеген Айдарбеков басшылар демалыс күнін нақты әрі заңды түрде бекітсін дейді.
БӨЛЕГЕН АЙДАРБЕКОВ, «Батыс ГеФиз Сервис» компаниясының жүргізушісі:
- Әйелім жұмыс жасайды. Әйелім айлықты көп алады. Мен далада жүргенмен 31 күн жұмыс жасаймын. Бірақ менің айлығым...тіпті айтуға ұяламын өзім.
«МұнайСпецСнаб» компаниясының 300 жұмысшысы да осымен алтыншы күн ереуілде. Сөздерінше, осында тұрған өздерін басшылары жұмыстан шығарып жіберген. Тіпті, әу бастан еңбек келісім шартын көрмегене едік дейді. Ал ереуілшілердің орнына басқа мамандар жұмысқа кірісіп кетіпті.
МЫРЗАБЕК ҚАЛДЫБАЕВ, «МұнайСпецСнаб Компани» ЖШС жүргізушісі:
- Мұнай саласында жұмыс жасағанмен айлықты ең жоғарысы 140 мың теңге алады. Ал ең төменгі айлық 85 мың теңге. Көбісі ойлайды бізді 300-400 мың, иә 500 мың теңге алады деп. Бізде олай емес.
Ал «Құнан Холдинг» компаниясына жалданып жұмыс істейтіндердің мәселесі шешілді. Алайда штаттық кестеде жұмыс істейтін 80 қызметкер бірден жұмыстан айрылғалы тұр. Ереуілді жалақының көтерілуін талап етіп бастағандар, мұндай жағдайда жұмыстан біржақты шешіммен шығару дұрыс емес деп есептейді.
АБАЙ ҚОЗЫБАЕВ, «Kunan Holding» компаниясының жүргізушісі:
- 80-ге жақын адамды жұмыстан шығарайын деп тұр ғой енді. Әркімде 4 баладан, 5 баладан бар. Қарайған кредит бар мына жүргізушілердің бәрі қалай күн көреді?
Жаңаөзен маңындағы ауылдардың тазалығына жауапты «Тазалық С» компаниясының қоқыс жинаушылары мен ауыр техникаларды жүргізетін жүргізушілердің ереуілге шыққаны сол еді көше бірден қоқысқа толып кетіпті. Ал жанайқайын жеткізбек болып көшеге шыққан қара жұмысшылар әкімдік пен басышылықтың әрекетіне налиды.
Акиматтың адамдары келіп халықтың әкеліп берген суына, қауын-қарбызын жеп мәз болып жатырсыңдар ма дейді. Ол не деген сұмдық?
СЕРІК ҚАРТАНБАЕВ, «Тазалық С» ЖШС директоры:
- Қарастырып жатырмыз қазір бәрін. Акимат тарапынан бізге ешқандай не жоқ. Біз халықтан түсетін түсіммен қызметкерлерімізге зарплатаны бөліп береміз.
Ереуілшілер асын осы жерде ішіп, үйлеріне бармастан далада түнеп жатыр. Оларға Жаңаөзеннің тұрғындары мен белсенділер ас-су әкеліп, қолдау көрсетеді. Ал бүгін ереуілшілер қатары сағат санап артты. Барлығы 9 компанияның жұмысшылары жалақының көтерілуін талап етіп тұр.
МАХАББАТ НҰРЖАНҚЫЗЫ, тілші:
- Күннің аптап ыстығында, ал кеште қапырықта дәл осылай отырып басшылықтың назарын аударғысы келген ереуілшілер құқық қорғау органдары тарапынан қыспаққа алынып жатқандарын айтады. Ал олар осы мәселенің шешілуіне облыс әкімі Серікбай Трұмовтың араласуын сұрайды. Егер қойылған талаптар орындалмаса, дәл осылай ереуілді жалғастыра беретіндерін жеткізді.
Махаббат Нұржанқызы, Сәбит Амангелдіұлы
Бізді әлеуметтік желіде оқыңыздар:
KZbin - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#Жаңаөзен #наразылықтар #жалақы_жыры