Abdulla Oripov. Eslash | Абдулла Орипов. Эслаш

ЭСЛАШ
Отам билан бирга отга мингашиб,
Китоб довонидан ошгандик бир вақт.
Қараб бўлмас эди пастга энгашиб,
Бир қадам нарида жарлик- ҳалокат.
Қандай ўтган эдик у йўлдан омон?
Эсласам, энтикиб кетаман ҳамон.
Тун эди, шаҳардан қишлоққа қараб,
Катта акам билан тушардик қирдан.
Тўртта бўри бизни олганди ўраб,
Уфқда тўрт отлиқ кўринди бирдан.
Биз улар туфайли қолгандик омон,
Эсласам, энтикиб кетаман ҳамон.
Кездим, ер юзини саёҳат қилдим,
Ортга қайтар бўлдим кемада бир кун.
Денгиз нималигин ўшанда билдим,
Балойи азимдай қутурди тўлқин.
Кемамиз тўфондан чиқди-ку омон,
Эсласам, энтикиб кетаман ҳамон.
Нима ҳам қилардим, иссиқ жон экан,
Мусофир юртларда чалиндим дардга.
Тириклик аслида имтиҳон экан,
Ахир зор бўлдим-ку мен ҳам мададга.
Кунимдан бор экан, соғайдим омон,
Эсласам, энтикиб кетаман ҳамон.
Бугун насиб этди салобатли ёш,
Шукрона айтаман барчаси учун.
Лекин нокаслар ҳам бўлдилар йўлдош,
Умримни эговлаб едилар бутун.
Не бахтким, баридан ўтолдим омон,
Эсласам, энтикиб кетаман ҳамон.
8.10.2014
Абдулла Орипов

[@user-st3bj3ij7f]

Юрагимдан кетмайди харкун бирон бир шерини эшитмасам куним утмайди рухлари шод булсин 😢❤❤

[@abbosbarnoyev6145]

Бебахо шерлар ёзганлар Дахо инсон жойлари жаннатлар булсин илохим.

[@user-py6kq3oq4r]

Yaxshi sher ekan

[@feruzshoymuradov5441]

Qanday guzal sher buni anglash kerak

[@azizbekhamroyev4741]

Muzikani sal pasaytirish kerak edi