Рет қаралды 15,117
Tema : Upaya pelestarian kesenian wayang golek melalui media sosial.
SINOPSIS SETA GUGUR
Arya Séta téh putrana Prabu Maswapati ti Karajaan Wirata. Séta hartina bodas. Dina carita Mahabharata kulit Séta téh bodas. Arya Séta boga adi nyaéta Arya Utara, Arya Wratsangka jeung Déwi Utari nu dipigarwa ku Radén Abimanyu. Arya Séta boga ajian Narantaka nu diwariskeun ka Gatotkaca.
Lalakon Séta Gugur minangka perang munggaran dina Baratayuda antara pihak Pandawa jeung Kurawa. Dina perang ieu, Karajaan Wirata ngadukung Pandawa. Dina babak kahiji perang dimimitian, Batara Kresna ngangkat Senopati Agung nyaéta Arya Séta. Dibantuan ku adina Arya Utara ti belah katuhu, sedengkeun ti belah kénca Arya Wratsangka. Pandawa ngagunakeun siasat Brajatisna (senjata nu seukeut), sedengkeun Kurawa ngagunakeun siasat Wukirjaladri (gunung samudra). Nu dipercaya jadi Senopati Agung Kurawa nyaéta Resi Bisma, diaping ku Prabu Salya ti Karajaan Mandaraka nu ngadukung Kurawa jeung Resi Dorna ti Sokalima.
Arya Utara jeung Arya Wratsangka gugur tiheula ku Prabu Salya jeung Resi Dorna. Waktu Arya Séta nyanghareupan Resi Bisma, sabenerna Arya Séta leuwih unggul boh kasaktian atawa tanaga. Ngan Arya Séta ngalakukeun tipu waktu nyanghareupan Arya Rukmarata putrana Prabu Salya waktu Resi Bisma kadéséh ka sisi walungan Gangga. Arya Séta api-api paéh waktu dipanah ku Rukmarata padahal néangan bongoh musuh. Rukmarata gugur ku Arya Séta. Kalakuan Séta kitu dianggapna teu satria ku para déwa. Antukna kasaktian Séta dicabut.
Waktu Resi Bisma kadéséh ku Arya Séta, ngaluarkeun aji bajra halimunan tepi teu katempoeun ku Arya Séta. Bisma antukna meunang bantuan ti éyangna Batara Gangga jeung ti ibuna Déwi Jahnawi. Arya Séta gugur ku senjata Kyai Salukat milik éyangna Resi Bisma. Babak kahiji perang Baratayuda dimeunangkeun ku pihak Kurawa.