من أجبر إيران على إلغاء الحجاب وشرطة الأخلاق؟

حلقات مقترحة
اجتياح الصين
• أمريكا تنجح فى اجتياح ...
تطبيع السعودية
• إسرائيل تنجح فى التطبي...
نصائح المخابرات لاختيار الزوجات
• نصائح المخابرات لاختيا...
اغتيال السادات
• اغتيال السادات.. لماذا...
تقسيم إيران
• تقسيم إيران
إيران تنقذ روسيا
• ايران تنقذ روسيا من ال...
بعد ما المظاهرات بدأت فى ايران.. ظهرت بنت ايرانية عمرها 19 سنه واسمها أرميتا عباسى.. وهى بتهاجم النظام على صفحتها بوسائل التواصل الاجتماعى.. البنت هاجمت النظام الايرانى اللى بيضرب ويقتل فى المتظاهرين.. لكن بعدها بكام ساعه مجموعة شباب فى لبس مدنى كسرو عليها باب شقتها.. وخطفوها.. خطفوها فين محدش يعرف.. كل اللى نعرفه هو ان لمدة 8 أيام كاملين محدش كان يعرف مكان البنت.. فين لحد ما أبوها وأمها جالهم تليفون من ظابط فى الحرس الثورى الايرانى.. بيعرض عليهم انهم لو عاوزين يشوفوا بنتهم.. يروحوا مستشفى الإمام على وهيلاقوها هناك.. ولو عاوزينها تروح معاهم.. فلازم يمضوا على إقرار بإن هما اللى دخلوا بنتهم المستشفى علشان تتعالج من مشكلة الجهاز الهضمى.. والمشكلة دى كانت سبب فى إصابة بإسهال دموى..
هنا طبعا الأب والأم رفضوا.. وفضلت الأم تصرخ والأب يبكى.. الأم تصرخ والأب يبكى.. وطلعوا جرى على مستشفى الإمام على علشان يلحقوا بنتهم اللى لسه لحد دلوقتى ميعرفوش ايه اللى جرالها.. لكن بمجرد ما وصلوا.. اكتشفوا ان ظابط الحرس الثورى الايرانى ورجالته خدوا البنت من المستشفى لمكان مجهول.. ورغم غياب بنتهم.. إلا ان المسعفين اللى استقبلوها قعدوا مع أهلها وحكولهم كل حاجه.. قالولهم ان بنتهم وصلت المستشفى من ساعات قليلة وهى بتعانى من نزيف فى فتحة الشرج.. ورغم احتياجها للعلاج إلا ان ظباط الحرس الثورى الايرانى خدوها تانى وخرجوا بيها من المستشفى.. وده حصل تقريبا بعد ما اتأكدوا ان الأب والأم مش هيمضوا على الاقرار اللى بيقول ان بنتهم كان عندها مشكله فى الجهاز الهضمى..
طيب أرميتا حصلها ايه بعد كده؟.. مصيرها ايه يعنى؟.. عايشه ولا ميته؟.. وأهلها اتصرفوا ازاى مع الحرس الثورى الايرانى؟.. هحكيلك دلوقتى.. لكن الأول خلينى أحكيلك حكاية شاب ايرانى تانى اسمه مهرشاد شهيدى.. وده من أشهر الطباخين فى ايران كلها.. مهرشاد نزل مظاهره ضد النظام الايرانى بعد قتل الفتاة الايرانية مهسا أمينى.. اللى حكينا قصتها فى حلقة تقسيم إيران.. مهرشاد كان زيه زى أى متظاهر تانى.. بيرفض قتل اى بنت ايرانية بسبب الحجاب.. خد بالك همسا أمينى لما قتلتها شرطة الأخلاق.. مكنتش قالعه الحجاب.. لكن حجابها مكنش معدول.. كان فى حته من شعرها باينه من تحت الحجاب.. فالموضوع معجبش شرطة الأخلاق فى ايران.. فسحبوها على قسم الشرطة وفضلوها يضربوا فيها لحد ما ماتت..
المهم.. مهرشاد ولأنه مشهور.. زى ما قولتلك من أشهر الطباخين فى ايران.. لدرجة انهم بيشبهوه بجيمى أوليفر.. الطباخ البريطانى المعروف.. فبمجرد ما نزل الشارع فى المظاهرة.. الحرس الثورى الايرانى شافه وعرفه.. فاصطادوه من بين المتظاهرين.. وهاتك يا ضرب فوق دماغه بالعصيان اللى في ايديهم لحد ما هو كمان مات..
طيب الشعب الايرانى عمل ايه بعد كل ده؟.. الشعب الايرانى غضبه زاد.. وبعد ما كان النظام الايرانى بيحاول يسيطر على المظاهرات بقوة السلاح وقتل المتظاهرين وتخويفهم.. بقى هو اللى بيجرى قدام المتظاهرين اللى مبقوش خايفين لا من النظام ولا من سلاحه.. سيدى المواطن يكفى أقولك ان من يوم ما المظاهرات بدأت فى ايران لحد النهاردة.. مات أكتر من 378 متظاهر.. وتم اعتقال الآلاف.. والأرقام دى تصريحات رسمية للحرس الثورى الايرانى.. يعنى أكيد الأرقام الحقيقية أعلى بكتير.. ورغم كده الناس فى الشوارع أعدادها بتزيد.. والخسائر فى الممتلكات بتزيد.. فمثلا مجموعة الهاكرز بلاك ريورد واللى اخترقوا هيئة الطاقة الذرية الايرانية من فترة.. نشروا تسريب للواء حسين سلامى رئيس الحرس الثورى الايرانى وهو بيبلغ قياداته بإن عدد المتظاهرين فى الشوارع وصل 600 ألف متظاهر.. ده فى الوقت اللى النظام الايرانى بيقول فيه لوسائل الاعلام ان عددهم 40 ألف بس..
ده غير ان نفس التسريبات أكدت زيادة حجم الخسائر فى المنشآت والممتلكات بقيمة تجاوزت ملايين الدولارات..
وهنا النظام الايرانى حس بإن التخويف والترهيب والقتل والاعتقال مش جايبين نتيجة.. وان نار المواجهة المسلحة بينه وبين الشعب الايرانى لو استمرت اكتر من كده أكيد هتحرقه هو.. الشعب هيبلع النظام.. فما كان من النظام الاسلامى الايرانى.. إلا إنه أعلن حل وتفكيك شرطة الأخلاق.. شرطة الاخلاق دى اللى كانت السبب أصلا فى المظاهرات.. لما قتلت البنت الايرانية مهسا امينى اللى حكيتلك قصتها قبل كده فى حلقة تقسيم ايران..
من المصادر
bit.ly/3Ba0agS
bit.ly/3FrQ510
bit.ly/3BbsDTd
bit.ly/3VzALFj
bit.ly/3HdkKAC
bit.ly/3h15rAh
bit.ly/3B7QH9O
bit.ly/3iFDs9X
bit.ly/3VyPOPG
cnn.it/3VzBdmZ
cnn.it/3H91gx5
cnn.it/3UraEz6
#المواطن_سعيد #ايران #إيران_قلعت_الحجاب