Ахмет Байтұрсынұлының домбырасы

Ахмет Байтұрсынұлының домбырасы қалай табылғанын білесіңдер ме?
Биыл 150 жылдығы атап өтіліп жатқан ұлт ұстазының домбырасы туралы қызық хикая бар. Бұл туралы Ахмет Байтұрсынұлы мемориалды музей-үйінің жетекшісі Райхан Имаханбет айтып берді.
Ол Ахметтің қандай да бір дүниесін тапсақ деген арманын әлеуметтік желіде жазған. Сол кезде домбыраны табуға Қызылорда тұрғыны Жұмабай Байзақұлы себепші болған екен.
Ахмет Байтұрсынұлының Зиляш деген туған қарындасы болған. Қарындасының ұлы Ахметтің жиені болғаны үшін біраз қудалау көрген. Домбыра Зиляштан оның ұлы Бәкібайға тиеді, сосын одан ұрпақтарына бұйырып, сол заманнан бізге жеткен екен.
Амал не, қолдан қолға өтіп, бертінге жеткен домбыра дұрыс сақталмай, бет қақпағы сынған екен. Оған себеп - бұл домбыра Ахметтікі екенін ұрпақтарының өзі көп уақыт бойы білмеуі. Қазіргі уақытта домбыра қайта қалпына келтіретін маманның қолында. Осы жұмыстардан кейін домбыра тарихи тұлғаның музей-үйіне ілінеді екен.