Рет қаралды 50,092
Ақтөбеде доңыз өсіретін базаның жабылуын талап еткен халық бүгін бас көтерді. Алты жылдан бері шошқаның нәжісіне уландық деген Бестамақ ауылының тұрғындары шыдамдарының таусылғанын айтады. Сөздерінше күніне үш жүздей доңыз соятын база оның ішек - қарнын ауылдың айналасын қазып көміп, ал нәжіс араласқан суды Елек өзеніне ағызып отыр. Ашынған халық енді облыс әкімі Оңдасын Оразалиннен көмек сұрап отыр.
Бестамақ ауылының тұрғындары алты жыл бойы әкім - қаралардан ауылының іргесіндегі мына шошқа базасын жабуды сұрап шаршағандарын айтады. Сөздерінше қазір шошқа өсіріп, оны бордақылап отырған базаның басшылары әуелде бұл жерге құс өсіреміз деп, кейін шошқаға толтырып, оның нәжісін өзенге ағызып, ал өлекселері мен ішек - қарындарын ауыл айналасына көмді дейді.
ЕРБОЛАТ КЕНЕТАЕВ, Бестамақ ауылының тұрғыны:
- Түйе құс ұстаймыз деді. Ал оның аяғы не болды? Бір баздың ішінде мыңдаған шошқа бар. Ішек - қарындары солайымен ашылып жатыр. Мұның исі деген мүмкін емес.
МАҚСАТ ЖОЛДЫБАЕВ, Бестамақ ауылының тұрғыны:
- Ауылда мешітіміз бар. Дінге сабақ оқытып отырған медресеміз бар. Атаның басы, атаның кесенесін салып қойды. Мына жерге әкелді де шошқа базасын ашып қойды.
Жергілікті билік көтерілген халықтан қорықты ма, әйтеуір халықты аңдуға полициядан бастап прокурорларға дейін келді. Алайда тұрғындарды шулатқан кәсіпкер кешегі төккен қалдықтарды бүгін көміп, баратын жолды жауып үлгеріпті. Бірақ ашынған тұрғындарға ол да кедергі болмады.
ЖАНАР ҚОЖАНОВА, тілші:
- Адамның қолқасына бірден тиетін иісті камера арқылы жеткізу мүмкін емес. Әйтпесе сіздер де мына өлген шошқалар мен оның жаман иісін де сезер едіңіздер. Ал халықты шулатқан баздың басшылары болса жиырма күннен бері мына жерге сойылған шошқалардың басынан бастап, ішек - қарны, нәжісіне дейін төккендерін ашықтан ашық мойындап отыр.
НҰРЫМ ҚҰМАРОВ, «Парижская коммуна» ЖШС директоры:
- Мына жерге іштегі қалған ішектерді көміп тастадық. Бізде икструда бар сол сынып қалып, сосын коустический содамен араластырып көміп тастады.
База төрт мың шошқа мен күніне сойылатын үш жүздей бас торайдың қалдығын өңдеп, оны заласыздандыратын техниканың істен шыққанын айтады. Ал аудан әкімі шошқа базасының жабылуын әкімдік емес сот шешеді дейді.
МАМЫРҒАЛИ АҚҚАҒАЗОВ, Алға ауданының әкімі:
- Арнайы келген комиссия кешегі жіберген кемшіліктердің бәрін тексереді. Соның қорытындысы бойынша егер сол дұрыс деп есептейтін болса, іс сотқа беріледі. Соттың шешімімен ғана мекемені тоқтатуға болады.
Наразылыққа шыққан халық ауылдарына облыс әкімі Оңдасын Оразалиннің келуін талап етіп, екі сағат күтті. Олар ауаны ластап, елді жағымсыз иіспен улап отырған шошқа базасын жапқызбай тоқтамайтындарын айтады.
Жанар Қожанова, Бағдат Баймурзин
Бізді әлеуметтік желіде оқыңыздар:
KZbin - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31