Ақтөбеде тұрмысқа шыққалы жатқан бойжеткен түрмеге отырды

Ақтөбеде тұрмысқа шыққалы жатқан бойжеткен түрмеге отырды. Жас жұп тізгінін ұстаған көліктің астына түскен отыз алты жастағы азамат есін жимастан қайтыс болған. Ал адам өліміне кінәлі ретінде жиырма екі жастағы Ұлжан Нұржанова айыпталған. Ал қыз, көлік апатына өзімен бірге қарсы бағытта келе жатқан прокурордың да кінәлі екенін айтады. Алайда бұл істе құқық қорғау органының өкілі куәгер ретінде көрсетілген.
Қайғылы оқиға болған кезде Ұлжан Нұржанованың сүйіктісі кінәні өз мойнына алған. Бірақ кейін "Ниссан" маркалы көлігінің рөлінде отырғанын қыз мойындайды. Күдіктінің айтуынша, ол жылдамдықты да асырмаған, бірақ кенеттен шыққан азаматты байқамай қалған. Ал соққы алған жаяу жүргінші қарсы бағытта келе жатқан прокурордың көлігіне түскен. Ұлжанның туысқандары, жазықсыз жанды өте үлкен жылдамдықпен келе жатқан құзырлы орган өкілі қақты деген пікірде. Алайда сараптама қорытындысы мен куәгерлер берген түсініктеме барысында, Ұлжан Нұржанова үш жылға бас бостандығынан айырылды. Сондай-ақ, қайтыс болған Серік Құшқымбаевтың балаларына екі миллион теңге өтемақы төлеу туралы шешім шығарды. Ал зардап шеккен тарап моральдық шығынды 10 миллион теңгеге бағалап отыр.