Alalá nº 203 "Os Verderoles" - TVG

Alalá nº 203 "Os Verderoles" - TVG
Emisión en Televisión de Galicia: 12/05/2012
Lugar de Gravación: Nigrán- Val Miñor
Visita a nosa canle: alala.crtvg.es
Os Verderoles, Os Miúdos, Os Leóns de Camos, Os Airiños do Val Miñor e Os Terribles de Donas son algúns dos grupos que puxeron música á vida nos concellos de Baiona, Gondomar e Nigrán desde as primeiras décadas do século XX ata hoxe. E cada un dos homes que tocaron neses grupos son historia viva da nosa música tradicional. Catro deles decidiron recuperar o nome dos míticos Verderoles e xuntarse de novo, cando xa teñen máis de setenta e de oitenta anos, para facernos viaxar co seu repertorio ata as festas daqueles anos trinta do século pasado nas que eles comezaban a soñar con ser músicos.
A música sémpre foi parte das súas vidas. Aínda que os distintos oficios que tiveron a penas lles deixasen tempo para tocar máis que nas festas familiares e cos amigos. Fixeron un esforzo tremendo para poder compaxinar as dúas cousas. Poñían e sacaban a roupa de gaiteiro entre un traballo e outro, días seguidos sen parar, ata o punto de quedarse despois a durmir durante as actuacións pero, iso si, sen perder nunca o ritmo.
Despois de tantos anos de trafego diario, agora levan unha vida moi tranquila. As súas ocupacións son xogar a partida no Fogar do Xubilado, atender a horta, ver o fútbol cos amigos, algunha que outra festa coa familia e, por suposto, ensaiar. Lembrando un repertorio que aprenderon hai máis de setenta anos. Grazas ó seu afán temos a sorte nós de escoitar pezas que doutro xeito se terían perdido no esquecemento. Grazas a tanto esforzo lograron o seu soño de nenos e, de paso, escribiron un anaco da historia da nosa música tradicional.