Рет қаралды 110,273
Осымен алты күнге созылған Түркиядағы алапат өрт әлі өшкен жоқ. Апаттан опат болғандар саны 8-ге жетті, ал зардап шеккендер 860-тан асты. Түркиялық басылымдардың бірі бірнеше жерден бір уақытта тұтанған қызыл жалынды террорлық ұйым қасақана жасаған болуы мүмкін екенін айтып отыр.
Түркияда соңғы күндері 107 орман өрті сөндіріліп, қызыл жалынның беті әжептеуір басылғанымен, қауіп әлі сейілмей тұр. Өйткені, табиғи нәубет аймағына кірген Анталья, Мугла, Мерсин, Адана мен Османийе және Кайсериде сөндірілмеген ошақтар бар. "Yeni Safak" газеті отты бір мезетте бірнеше жерден елде тыйым салынған "Күрдістан" террорлық ұйымы қойған болуы мүмкін екенін мәлімдеп жазды. Ал "Анадолы" ақпараттық агенттігінің таратқан мына бір видеосында екі ер адамның құрғақ шөптің жанына барып отты тұтатқаны түсіп қалған. Түркия Президенті елдің берекесін қашырғандарды ұстасақ оңдырмаймыз деп отыр.
PЕЖЕП ТАЙЫП ЕРДОҒАН, Түркия президенті:
- Миластағы өртке байланысты бір адам ұсталды. Бұған дейін айтып келгенімдей, "Күрдістан" террорлық ұйым басшыларының ормандарды өртеу туралы тапсырмаларынан кейін от шалған алқаптардың аумағы 2 есеге артып кетті. Түнеугүні болған өрттің кейбірі дәл осындай бұйрықпен жасалған болуы мүмкін деген күдік бар.
Қызыл жалын лап бергенде Түркия билігі Мармарис пен Бодрумдағы туристерді дер кезінде қауіпсіз жерге көшіріп үлгерген. Ал Манавгаттан түк қалмады деген тұрғындар өрттен кейінгі үйлері мен қора-қопсыларын көріп шарасыз екендіктерін айтып жыларман күйде.
Қазір өртті толық сөндіру үшін Әзербайжан, Украина, Иран мен Ресейден көмекке жіберілген жүздеген техниканың көмегімен 4 мың адам арпалысып жатыр. Көк аспанды бір аптадан бері қою күңгірт түске айналдырған апаттан кейін көтерілген күл енді Аланьяға да жетіпті.
МИРБЕК ТҰРМАҒАМБЕТОВ:
- Өрт кеше Аланьядағы Махмутлар ауданындағы тауға жеткен. Дер кезінде сөндіріп үлгеріпті. Соның күлі қалаға дейін ұшып келді. Ал Антальяда қазір лаулап жатқан өрт жоқ, бірақ қаланы түтін басқан. Оны Қазақстаннан келіп жатқан достарым да әуежайдан түсе салып байқап айтып жатыр. Ұшақтар әр 20 минут сайын теңізден су алып, өртті әлі сөндіруде.
Түркияға Қазақстаннан тікелей рейстерге шектеу жоқ. Турагенттіктер билет сатып алған азаматтарға шекара жабылмайды, демалыстарыңыз ойдағыдай өтеді деп сендіруде. Еліміздің сыртқы істер министрлігі зардап шеккендердің ішінде әзірге қазақстандықтардың жоқ екенін мәлім етті. Ал Қазақстанның Түркиядағы Елшілігі біздің тарап көрші елге алдағы уақытта орман алқабын егіп беруге дайындалып жатқанын жеткізді.
Әйгерім Ердәулет
Бізді әлеуметтік желіде оқыңыздар:
KZbin - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#алапат_өрт #Түркия #табиғи_апат