Рет қаралды 70,188
Алматы-Ташкент-Алматы халықаралық бағытында жүре бастаған жүрдек пойыз бүгін елге оралды. Мамандар Қазақстан мен Өзбекстан президенттерінің келісімінің арқасында жүзеге асқан жоба екі елдің игілігіне жұмыс істейтініне сенімді.
Алматы-Ташкент жүрдек пойызын перронға жиналған қауым сән-салтанатпен жолға шығарып салды. Ұзақ сапардың машақатын білетін жолаушылар енді екі елдің арасын жүрдек пойыз байланыстырғанына дән риза. Пойыз кең шанақты отандық «Тұлпар-Тальго» вагондарынан жасақталған.
Нұрдәулет Қилыбай, «Жолаушылар тасымалы» АҚ президенті:
-Әзірге аптасына екі күн қатынайтын болады. Кейін жолаушылар көбейіп жатса, оны да көбейтеміз. Біздің пойыз сенбі, дүйсенбі күндері Ташкентке жүретін болады.
Ал сейсенбі, жексенбі күндері кері қарай шығады. Билет құны қолжетімді. Отыратын орындар 4200, купе 9300, ал люкс 13 мың теңге тұрады. Бала-шағасын алып, туған еліне бара жатқан Наргиза Назарова: «Пойыз қауіпсіз», - дейді.
Нұрсұлтан Назаров, жолаушы:
-Демалысқа шығып, Өзбекстанға бара жатырмыз. Бегабад қаласында менің туыстарым тұрады.
Ұлан Нарынбек, тілші:
-Жол мұраты - жету. Ал діттеген жеріңізге жайлы барсаңыз тіпті жақсы. Алматы-Ташкент халықаралық пойызында жолаушыларға барлық жағдай жасалған. Мысалы, мүмкіндігі шектеулі жандарға арналған мынандай арнайы купе де бар.
Сондай-ақ мүмкіндігі шектеулі адамдарға билет құны 70 пайыз жеңілдікпен сатылады. Жолсеріктер де әрдайым көмектесуге дайын.
Жазира Амзеева, жолсерік:
-Жолсерікті кез келген уақытта түймешені басып шақыра алады. Мүмкіндігі шектелген адамдарға арналған душ кабинасы бар.
900 шақырымға жуық жолды жүрдек пойыз 16,5 сағатта жүріп өтті. Алғашқы жолаушылармен бірге келген арнайы делегаттарды өзбек теміржолшылары гүл шоқтарымен күтіп алды. Тараптар пойыздың шекарадан көп кідірмей өтуіне барынша жағдай жасалатынын айтады.
Бунёд Эгамбердиев, «Өзбекстан темір жолдары жолаушылар тасымалы» АҚ бөлім басшысы:
-Пойыз екі елдің шекарасынан жеңілдетілген тәртіппен өтеді. Өзбекстандық шекарашылар құжат пен жүк тексеруге ең көбі 50, ал қазақстандық әскерилер 30 минут жұмсайды. Яғни тексеруге кететін уақыт 1,5 сағаттан аспайды.
Алматы-Ташкент бағытындағы алғашқы жүрдек пойыз 600-ден астам жолаушы тасымалдады. Теміржолшылар болашақта жолаушылар санының артатынына сенімді.
Авторлары: Ұлан Нарынбек, Ғани Бекенов