ანბანეთში შებრძანება - 2023

როცა პირველი ზარის ემოციამ ჩაიარა და ნაბიჯ-ნაბიჯ მოსწავლეობას სწავლობენ, სსიპ ქალაქ თბილისის N103 საჯარო სკოლის პირველკლასელებმა ლალი თეთრაძის ხელმძღვანელობით იზეიმეს ,,ანბანის შემობრძანება“ და ეს ლამაზი წუთები მარადიულ მოგონებად აქციეს!
პირველი ასო-ბგერებით იწყება საინტერესო მოგზაურობა ანბანის სამყაროში, ამიტომ მნიშვნელოვანია ამ მოვლენის ზღაპრად გადაქცევა.
ანბანეთში შებრძანება განსაკუთრებული დღეა! პირველკლასელები პირველად ეზიარებიან ქართულ ანბანს და ამოიკითხავენ უტკბილეს ფრაზას. სწორედ ,,აი ია“ გაუწევს მეგზურობას მათ ქართული ენის საინტერესო და მადლიან სამყაროში. ქართულ ენას ხომ მსოფლიოს სხვადასხვა დამწერლობებს შორის საპატიო ადგილი უჭირავს, თან სიძველით მეხუთე ადგილზეა, სილამაზით კი მესამეზე.
პირველკლასელებს ვუსურვებთ, ჩაწვდნენ მშობლიური ენის სიღრმეს, სიწმინდესა და სიდიადეს. კეთილი იყოს მათი სვლა ანბანეთის სამეფოში, რომელიც ასე ლამაზად შემოვიდა მათ ცხოვრებაში.