Рет қаралды 168,671
Qarabağ nisgilini, qabıq bağlamayan yaramızı, vətənə olan müqəddəs hisslərimizi məhz bu avaz ifadə etdi illərlə. Tacir Şahmalıoğlunun 12 yaşında oxuduğu “Bayatı-Şiraz”ı hər dinlədiyimizdə iliklərimizə qədər hiss etdik Qarabağın yoxluğunu, torpaqlarımızın bağrını qanadan düşmənin ayaq səslərini. Ancaq etiraf edək ki, 30 ilə yaxın müddətdə bizi Qarabağdan, Qarabağı da bizdən ayırmayan, ayrılmağa qoymayan məhz 12 yaşlı Tacirin “Bayatı-Şiraz”ı oldu.
Bəs heç düşünmüsünüzmü bu mahnı necə yaranıb?
Tacir Şahmalıoğlunun özünü dinləyək: “Bayatı Şiraz”ın yaranma tarixi 1976-cı ildədir. Bizim bədii rəhbərimiz Murad Rzayev eşidib ki, Sarıcalı kəndində belə bir uşaq var. Gəlib atamın yanına dedi ki, bu uşağı burda paslanmağa qoymayın, verin mənə, Bakıya aparım. 1977-ci ildə köhnə Lenin sarayı, indiki Heydər Əliyev sarayında bizim konsertimiz var idi. Mən səhnənin arxasında idim, səhnəyə çıxmaq üçün növbəmi gözləyirdim. İlk olaraq səhnədə ariya səslənməyə başladı Bethovenin əsərindən. Səhnənin arxasında həmin qalın səsli kişi ariyanı oxumağa başladı. Musiqi məni təsirləndirdi, düşdü dilimə. Yavaş-yavaş başladım zümzümə etdim, “Bayatı-Şiraz”ı oxudum öz-özümə”.
12 yaşlı Tacir öz-özünə etdiyi o zümzüməni müəllimi Murad Rzayevlə bölüşmək qərarına gəlir: “Murad bəy, sizə bir şey var ki, onu oxumaq istəyirəm icazə versəniz. Dedi ki, oxu görüm. Qarmonçalan Elçin Cümşüdoğlu tez qarmonu götürdü, uşaqlardan biri zərbi, Murad müəllim özü də tarı götürdü, “Bayatı-Şiraz” üstündə. Oxudum, Murad müəllim özü də məəttəl qaldı ki çox gözəl, maraqlı ifa oldu. Dedi ki, Abbas Səhhətin “Vətən” şeirinin sözlərini kim bilir? Uşaqlardan biri dedi ki, mən bilirəm. Çünki bizim əhatəmizdə qiraətçilər də olurdu. Murad müəllim dedi ki, gəl “Bayatı-Şiraz”ı Abbas Səhhətin misraları ilə oxu. Yəni oxuduğum kimi (oxuyur). Bir müəllim kimi mənə yol göstərdi, mən də oxudum”.
30 illik yurd həsrətimizin sona çatdığı, qələbəmizin sevincini doya-doya yaşadığımız bu günlərimizdə də bizə ruh verən təkrarsız avazdır “Bayatı-Şiraz”. Yanıb-yaxıla dinlədiyimiz bu muğamı artıq nisgillə, həsrətlə yox, sevinc və coşğu ilə dinləyirik. Hər misrasında Vətən duyulan sevgi var, Qarabağ var, qələbə var “Bayatı-Şiraz”da. Elə muğama can verən Tacir Şahmalıoğlu da ilk dəfə qələbə sevinci ilə yenidən zümzümə etdi “Bayatı-Şiraz”ı.
Müğənni ifasının uşaqlıqdakı kimi cazibədar alınmadığını özü də etiraf edir. Tacir Şahmalıoğlu hesab edir ki, “Bayatı-Şiraz” toxunulmazdır. Bu səbəbdən özünün ifasında şöhrət tapan bu muğamı hətta oğlunun da oxumasına icazə verməyib: “Bu musiqi, bu improvizə əvəzolunmazdır. Bu toxunulmaz bir şeydir, buna niyə toxunurlar ki? Bu elə bir musiqidir ki, Azərbaycanın qəmli günündə də, sevincli günündə də insanlar bunu sevir, dinləyir. Ruhi qida kimi əsgərlərimizə ilham verdi bu muğam. Bütün Azərbaycan xalqı bu mahnını ürəklərinin üzərində gəzdirir. Ona görə də bu musiqi toxunulmazdır. Mən çox xahiş edirəm ki, buna toxunmasınlar, dəyməsinlər!”
Doğulduğu Ağdam rayonunun da işğaldan azad olunmasından ilhamlanan ifaçı bu münasibətlə qələmə aldığı şeirdə də “Bayatı-Şiraz”ın hər zaman təravətli qalacağına eyham vurub:
Qoynunda gəzdiyim qoca dağlarda,
Gənclik illərimin sirləri yatır.
Sonalı göllərdə, buz bulaqlarda
Qəlbimi sızladan illəri yatır.
Mən dağlar qoynunda dünyaya gəldim,
Torpağı hər zaman müqəddəs bildim,
Qəlbimdən silinməz Vətəndir dərdim,
Çünki orda qeyrətli oğullar yatır.
Özüm qocalsam da, nəğməm təzədi,
Milyon insanların könlün bəzədi,
Tacirəm, sevənlərim, sözüm sizədi,
Qəlbimdə hələ neçə nəğmələr yatır.
Qarabağımıza olan sevgimizin, Vətənə olan müqəddəs hisslərimizin şərhidir “Bayatı-Şiraz”. Səslən, “Bayatı-Şiraz”, başını dik, avazın uca olsun! Hər qarışı şəhid qanıyla sulanan, çölünə, düzünə Vətən dediyimiz torpaqların səmasına ucalsın səsin! Qarabağdan, Şuşadan bir daha əskilməsin avazın!
Rəsmi facebook səhifəmiz: / tvapaxeber
Rəsmi instagram səhifəmiz: / apatvresmi
Rəsmi twitter səhifəmiz: / apatvofficial
#apatv #apaxeber