ATMU Məzun günü 30.06.2022

İyunun 30-da Azərbaycan Turizm və Menecment Universitetinin (ATMU) sonuncu kursu uğurla başa vuran tələbələrinin “Məzun günü” keçirilib.
“Məzun günü”ndə çıxış edən Azərbaycan Turizm və Menecment Universitetinin rektoru İlham Mədətov məzunları təbrik edərək onlara ixtisaslı kadr kimi gələcək fəaliyyətlərində uğurlar arzulayıb. İlham Mədətov qeyd edib ki, bu il universitetdən məzun olan 457 tələbədən 365 nəfəri bakalavr, 92 nəfəri isə magistr pilləsini bitirib. Rektor məzunlardan 18 nəfərin eyni zamanda Avstriyanın IMC Krems Tətbiqi Elmlər Universitetinin (TEU) də diplomuna sahibləndiklərini, ümumilikdə universitet məzunlarının 278 nəfərinin iki diploma malik olduqlarını diqqətə çatdırıb.
Tələbələrlə bir yerdə olmaqdan məmnunluğunu bildirən Dövlət Turizm Agentliyinin sədri Fuad Nağıyev pandemiya səbəbindən son 2 ildə məzun gününün keçirilmədiyini, 2022-ci il məzunlarının bu günü maskasız və məhdudiyyətsiz keçirdiklərinə görə şanslı olduqlarını qeyd edib.