Рет қаралды 16,391
༄༅། །ཐུགས་རྗེ་ཆེན་པོའི་བསྒོམ་བཟླས་འགྲོ་དོན་མཁའ་ཁྱབ་མ་བཞུགས་སོ། །
སྤྱན་རས་གཟིགས་བསྒོམ་བཟླས་ནི། དང་པོ་སྐྱབས་སེམས།
སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །
བྱང་ཆུབ་བར་དུ་བདག་ནི་སྐྱབས་སུ་མཆི། །
བདག་གི་སྦྱིན་སོགས་བགྱིས་པའི་བསོད་ནམས་ཀྱིས། །
འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །
ཇོ་བོ་སྐྱོན་གྱིས་མ་གོས་སྐུ་མདོག་དཀར། །
རྫོགས་སངས་རྒྱས་ཀྱིས་དབུ་ལ་བརྒྱན། །
ཐུགས་རྗེའི་སྤྱན་གྱིས་འགྲོ་ལ་གཟིགས། །
སྤྱན་རས་གཟིགས་ལ་ཕྱག་འཚལ་ལོ། །
གསོལ་བ་འདེབས་སོ་བླ་མ་སྤྱན་རས་གཟིགས༔
གསོལ་བ་འདེབས་སོ་ཡི་དམ་སྤྱན་རས་གཟིགས༔
གསོལ་བ་འདེབས་སོ་འཕགས་མཆོག་སྤྱན་རས་གཟིགས༔
གསོལ་བ་འདེབས་སོ་སྐྱབས་མགོན་སྤྱན་རས་གཟིགས༔
གསོལ་བ་འདེབས་སོ་བྱམས་མགོན་སྤྱན་རས་གཟིགས༔
ཐུགས་རྗེས་ཟུངས་ཤིག་རྒྱལ་བ་ཐུགས་རྗེ་ཅན༔
མཐའ་མེད་འཁོར་བར་གྲངས་མེད་འཁྱམས་གྱུར་ཅིང༔
བཟོད་མེད་སྡུག་བསྔལ་མྱོང་བའི་འགྲོ་བ་ལ༔
མགོན་པོ་ཁྱེད་ལས་སྐྱབས་གཞན་མ་མཆིས་སོ༔
རྣམ་མཁྱེན་སངས་རྒྱས་ཐོབ་པར་བྱིན་གྱིས་རློབས༔
ཐོག་མེད་དུས་ནས་ལས་ངན་བསགས་པའི་མཐུས༔
ཞེ་སྡང་དབང་གིས་དམྱལ་བར་སྐྱེས་གྱུར་ཏེ༔
ཚ་གྲང་སྡུག་བསྔལ་མྱོང་བའི་སེམས་ཅན་རྣམས༔
ལྷ་མཆོག་ཁྱེད་ཀྱི་དྲུང་དུ་སྐྱེ་བར་ཤོག༔
ཨོཾ་མ་ཎི་པདྨེ་ཧཱུྂ༔ ཨོཾ་མ་ཎི་པདྨེ་ཧཱུྂ༔
ཐོག་མེད་དུས་ནས་ལས་ངན་བསགས་པའི་མཐུས༔
སེར་སྣའི་དབང་གིས་ཡི་དྭགས་གནས་སུ་སྐྱེས༔
བཀྲེས་སྐོམ་སྡུག་བསྔལ་མྱོང་བའི་སེམས་ཅན་རྣམས༔
ཞིང་མཆོག་པོ་ཏཱ་ལ་རུ་སྐྱེ་བར་ཤོག༔
ཨོཾ་མ་ཎི་པདྨེ་ཧཱུྂ༔ཨོཾ་མ་ཎི་པདྨེ་ཧཱུྂ༔
ཐོག་མེད་དུས་ནས་ལས་ངན་བསགས་པའི་མཐུས༔
གཏི་མུག་དབང་གིས་དུད་འགྲོར་སྐྱེས་གྱུར་ཏེ༔
གླེན་ལྐུགས་སྡུག་བསྔལ་མྱོང་བའི་སེམས་ཅན་རྣམས༔
མགོན་པོ་ཁྱེད་ཀྱི་དྲུང་དུ་སྐྱེ་བར་ཤོག༔
ཨོཾ་མ་ཎི་པདྨེ་ཧཱུྂ༔ཨོཾ་མ་ཎི་པདྨེ་ཧཱུྂ༔
ཐོག་མེད་དུས་ནས་ལས་ངན་བསགས་པའི་མཐུས༔
འདོད་ཆགས་དབང་གིས་མི་ཡི་གནས་སུ་སྐྱེས༔
བྲེལ་ཕོངས་སྡུག་བསྔལ་མྱོང་བའི་སེམས་ཅན་རྣམས༔
ཞིང་མཆོག་བདེ་བ་ཅན་དུ་སྐྱེ་བར་ཤོག༔
ཨོཾ་མ་ཎི་པདྨེ་ཧཱུྂ༔ཨོཾ་མ་ཎི་པདྨེ་ཧཱུྂ༔
ཐོག་མེད་དུས་ནས་ལས་ངན་བསགས་པའི་མཐུས༔
ཕྲག་དོག་དབང་གིས་ལྷ་མིན་གནས་སུ་སྐྱེས༔
འཐབ་རྩོད་སྡུག་བསྔལ་མྱོང་བའི་སེམས་ཅན་རྣམས༔
པོ་ཏཱ་ལ་ཡི་ཞིང་དུ་སྐྱེ་བར་ཤོག༔
ཨོཾ་མ་ཎི་པདྨེ་ཧཱུྂ༔ཨོཾ་མ་ཎི་པདྨེ་ཧཱུྂ༔
ཐོག་མེད་དུས་ནས་ལས་ངན་བསགས་པའི་མཐུས༔
ང་རྒྱལ་དབང་གིས་ལྷ་ཡིས་གནས་སུ་སྐྱེས༔
འཕོ་ལྟུང་སྡུག་བསྔལ་མྱོང་བའི་སེམས་ཅན་རྣམས༔
པོ་ཏཱ་ལ་ཡི་ཞིང་དུ་སྐྱེ་བར་ཤོག༔
ཨོཾ་མ་ཎི་པདྨེ་ཧཱུྂ༔ཨོཾ་མ་ཎི་པདྨེ་ཧཱུྂ༔
བདག་ནི་སྐྱེ་ཞིང་སྐྱེ་བ་ཐམས་ཅད་དུ༔
སྤྱན་རས་གཟིགས་དང་མཛད་པ་མཚུངས་པ་ཡིས༔
མ་དག་ཞིང་གི་འགྲོ་རྣམས་སྒྲོལ་བ་དང༔
གསུང་མཆོག་ཡིག་དྲུག་ཕྱོགས་བཅུར་རྒྱས་པར་ཤོག༔
འཕགས་མཆོག་ཁྱེད་ལ་གསོལ་བ་བཏབ་པའི་མཐུས༔
བདག་གི་གདུལ་བྱར་གྱུར་པའི་འགྲོ་བ་རྣམས༔
ལས་འབྲས་ལྷུར་ལེན་དགེ་བའི་ལས་ལ་བརྩོན༔
འགྲོ་བའི་དོན་དུ་ཆོས་དང་ལྡན་པ་ཤོག༔
དེ་ལྟར་རྩེ་གཅིག་གསོལ་བཏབ་པས༔
འཕགས་པའི་སྐུ་ལས་འོད་ཟེར་འཕྲོས༔
མ་དག་ལས་སྣང་འཁྲུལ་ཤེས་སྦྱངས༔
ཕྱི་སྣོད་བདེ་བ་ཅན་གྱི་ཞིང་༔
ནང་བཅུད་སྐྱེ་འགྲོའི་ལུས་ངག་སེམས༔
སྤྱན་རས་གཟིགས་དབང་སྐུ་གསུང་ཐུགས༔
སྣང་གྲགས་རིག་སྟོང་དབྱེར་མེད་གྱུར༔
སྣང་གྲགས་རིག་སྟོང་དབྱེར་མེད་གྱུར༔
ཨོཾ་མ་ཎི་པདྨེ་ཧཱུྂ༔
བདག་གཞན་ལུས་སྣང་འཕགས་པའི་སྐུ༔
སྒྲ་གྲགས་ཡི་གེ་དྲུག་པའི་དབྱངས༔
དྲན་རྟོགས་ཡེ་ཤེས་ཆེན་པོའི་ཀློང༔
དགེ་བ་འདི་ཡིས་མྱུར་དུ་བདག ༔
སྤྱན་རས་གཟིགས་དབང་འགྲུབ་གྱུར་ནས༔
འགྲོ་བ་གཅིག་ཀྱང་མ་ལུས་པ༔
དེ་ཡི་ས་ལ་འགོད་པར་ཤོག༔
དེ་ཡི་ས་ལ་འགོད་པར་ཤོག༔
#prayer #buddhistprayer #chenrezig #monlam