Рет қаралды 3,853
Биыл жазушы-драматург, Мемлекеттік сыйлықтың лауреаты Асқар Сүлейменовтің туғанына - 80 жыл. Осыған орай, Алматыдағы Мұхтар Әуезов атындағы драма театрында «Асқар Сүлейменов және театр» атты көрме ашылды. Сондай-ақ, қаламгердің «Адасқақ» әңгімелер циклі бойынша «Біржанның соңғы әні» спектаклі сахналанды. Қойылымның бас кейіпкері - қазақтың атақты әнші-композиторы Біржан сал Қожағұлұлы, ал, режиссері Әубәкір Рахимов. Өнербаяндық көркем қойылым оқиғалары бір күн ішінде өң мен түс арасында өтеді. Өмірінің соңында дерт деңдеген Біржан салдың Абай, Ақанмен ойша кездесулері, өнер адамының ұстанымы жайындағы көзқарастары беріледі. Ал, көрмеде ұлттық өнердің түлеуіне зор үлес қосқан тұлғаның өмір жолы көрсетілді. Сол тұстағы рухани көшбасшылардың бірі болған атпал азаматтың ұлттық мүддені ту еткен қызмет жолына қатысты суреттері қойылды.