Рет қаралды 568,146
በስመ አብ ወወልድ ወመንፈስ ቅዱስ አሀዱ አምላክ አሜን። ውድ የተዋህዶ ቤተሰቦች እንደምን ቆያችሁ እንደ ሐጥያታችን ብዛት ሳይሆን እንደ ምህረቱ እንደ ቸርነቱ ብዛት በዚህች ሰዓትና ደቂቃ ላደረሰን አምላክ ክብርና ምስጋና ዉዳሴና አምልኮት ከአጽናፍ ዓለም እስከ አጽናፍ ዓለም ለእርሱ ይሁን አሜን። ልባችሁ አይታወክ።
በዚህ ሰዓት ሁላችንንም ሊያሳውኩን ከሚችሉ ችግሮች መካከል አንዱ በቤተክርስቲያን ላይ እየደረሰ ያለው ፈተና ነው፡፡ ታዲያ ለስም አጠራሩ ክብር ይግባውና ጌታችን አምላካችንና መድኃኒታችን ኢየሱስ ክርስቶስ በመዋዕለ ሥጋዌው በአንጻረ ሐዋርያት ለእኛ “ወበዓለምሰ ሐማመ ትረክቡ በዓለም ሳላችሁ መከራ አለባችሁ /ዮሐ16፥33/ ነው ያለን፡፡ “ከመካከላችሁ አድር ዘንድ መቅደስ ይሥሩልኝ” ያላት ሕንፃ ቤተክርስቲያንን /ዘጸ 25፥8/ ይሁን “ኢተአምሩኑ ከመ ታቦቱ ለእግዚአብሔር አንትሙ ወመንፈሰ እግዚአብሔር ላዕሌክሙ- የእግዚአብሔር ቤተመቅደስ እንደሆናችሁ የእግዚአብሔርም መንፈስ እንዲኖርባችሁ አታውቁምን?” የተባልን እያንዳንዳችን ምእመናንም ሆነ ማኀበረ ምእመናን በዓለም እስካለን ድረስ መከራ አለብን፡፡
በክርስትናው ምክንያት ክርስቲያን በመሆኑ ብቻ፣ ሕገ እግዚአብሔርን ላክብር በሕጉ ልገዛ በማለቱ ብቻ መከራ ያላገኘው “ክርስቲያን ነኝ” የሚል ሰው ቢኖር ክርስቲያን ሊባል አይገባውም፤ ክርስቲያንም አይደለም፡፡ ምክንያቱም ክርስቲያን ኑሮውና ሕይወቱ የሥጋዊ የመከራ ሕይወት ነውና፡፡ ለዚህም አይደል ጌታችን “ማንም መስቀሉን ተሽክሞ በኋላዬ የማይመጣ ደቀመዝሙሬ ሊሆን አይችልም” ያለው /ሉቃ 14፥27/ መስቀል ማለት መከራ ማለት ከሆነ “መስቀሉን” ብሎ ደግሞ እያንዳንዱ ምእመን የራሱ የሆነ በአቅሙ ሊፈተንበት የሚገባ መከራ እንዳለው ከነገረን፣ በክርስትናው ምክንያት ፈተና እና መከራ ያልገጠመው ሰው እንዴት ብሎ ነው ከክርስቶስ ቃል በተቃራኒ ቆሞ “እኔ የክርስቶስ ደቀ መዝሙር ነኝ” ሊል የሚችለው? እንዲህ ዓይነቱ ሰው በድፍረቱ እንዲህ ሊል ቢችልም እንዲያ በማለቱ ግን ክርስቲያን አያሰኘውም፡፡ ለዚህ ነው አበው ቅዱሳን ሳይፈተኑ ሲቀሩ “ጌታዬ ሆይ ምነው ተውኸኝ” እያሉ ወደ አምላካቸው በእንባ የሚጸልዩት፡፡
ቤተክርስቲያንም እንዲህ ነች፡፡ በዓለም መላአክት ከተመሠረተችበት ጊዜ ጀምሮ ፈተና ተለይቷት አያውቅም፡፡ በዓለም መላእክት ሳጥናኤል ለማሳሳት በሞከረ ጊዜ በቅዱስ ገብርኤል “ንቁም በበሕላዌነ እስከ ነአምሮ ለአምላክነ” በሚል ፈታውራሪነት በበዓታቸው ጸንተው ሊቆሙ ቻሉ፡፡
በሕገ ልቡናም በእነ አብርሃም በእነ ኖኀ ዘመን ብዙ ልጆቿ በአፍአ /በውጭ/ ስለሆኑባት /ወደ አምልኮተ እግዚአብሔር ስላልገቡላት/ የፍቅር እጆቿ ተዘርግቶ በእቅፏ የሚገቡ ምእመናን በማጣት የደረሰባት ጭንቅ፣ ሐዘንና መከራ እንዲህ በቀላሉ የሚነገር አልነበረም፡፡
በሕገ ኦሪትስ ቢሆን ቤተክርስቲያን መች ከፈተና አርፋ ታውቅና! ከሰብአ ዓለም ላይቶ “ሕዝቤ” ይላቸው የነበረ እስራኤላውያን፣ ለእነሱና ለዓለም የሚሆን መልእክትና መመሪያ ከአምላካቸው ቃል በቃል እየተነጋገረ ለመምጣት የሔደውን ሊቀ ነቢያት ሙሴን አርባ ቀን መጠበቅ ተስኗቸው የእጃቸው ሥራ ለሆነ ለጥጃው ምስል በመስገድ ቤተክርስቲያንን እንዴት እንዳሳዘኗት ለመናገር ምን ቃል ይገኛል?