Рет қаралды 2,049
Balaxanı qəsəbəsində Azərbaycan və Almaniyanın birgə layihəsi olan Alman Fasad Texnologiyaları Zavodu istifadəyə verilib.
CBC xəbər verir ki, Azərbaycan İqtisadiyyat Nazirliyinin təşəbbüsü ilə tikilən zavodun ümumi dəyəri 70 milyon manatdır. Layihəyə qoyulan investisiyanın 80 faizi Azərbaycanın, qalanı isə Almaniyanın payına düşüb.
Vladimir Sabezki, zavodun baş direktoru: “Zavodumuz qapı-pəncərə və fasad istehsalatı ilə məşğul olacaq. Zavod ildə 60-80 min kvadrat metr istehsalat gücünə malikdir. İlkin mərhələdə biz yerli bazarı istehsal etdiyimiz məhsullarla təmin etmək niyyətindəyik. Gələcəkdə qonşu Gürcüstan və İranla əməkdaşlıq etməyi planlaşdırırıq. Bütün xammal və texnologiya Almaniyadan gətirilib”.
Alman Fasad Texnologiyaları Zavodu layihəsinin reallaşdırılması üçün Sahibkarlığa Kömək Milli Fondu güzəştli kredit ayırıb.
Səməd Bəşirli, İqtisadiyyat Nazirliyinin şöbə müdiri: “Layihənin əhəmiyyəti əsas ondan ibarətdir ki, bu layihə əsasən yüksək əlavə dəyər yaradan layihədir. İstifadə olunan avadanlıqlar və məhsullar Azərbaycanda tikintinin müxtəlif sferalarında tətbiq olunacaq. Layihə nəticəsinə yeni iş yerləri yaradılacaq”.
Qeyd edək ki, Alman Fasad Texnologiyaları Zavodunda istehsal prosesində 50 işçi olmaqla, ümumilikdə 200 nəfər işlə təmin olunacaq.