Рет қаралды 1,709
Алматыда балаларға қосымша білім беру орталықтарының басшылары наразылық білдірді. Мектепке дейінгі және мектеп жасындағы оқушылардың бос уақытында білім беру, демалысын тиімді ұйымдастырумен айналысатын мекемелер де карантинге жабылды. Алматы мемлекеттік бас санитар дәрігерінің қаулысымен 19 наурыздан бастап, осындай оқу орталықтарының жұмысы тоқтаған еді.
Бүгін БАҚ өкілдеріне мұңын шаққан қосымша білім беру орталықтарының өкілдері мектептердің, оның ішінде жеке меншік мектептердің де ҚР Мемлекеттік бас санитар дәрігердің 2020 жылғы 25 желтоқсандағы № 68 қаулысы негізінде жұмыс істеп жатқанын алдыға тартады. Яғни коронавирустың асқынуына қарамастан орта білім беру мекемелері 15 адамға дейінгі толымдылықпен оқуын жалғастырып жатыр. Бүгін қосымша білім беру орталықтарның өкілдерінен құралған бастамашыл топ санитар дәрігер мен қала басшысына үндеу жолдады.
Алматыда қазір ересектер мен оқушыларға қосымша білім беретін 800 орталық тіркелген. Бұл жерде 15 мыңға жуық адам еңбек етеді. Бұл орталықтардың карантинге байланысты жабылуы қала бюджетіне де кері әсер етеді. Бұл орталықтардың бір айғы табысы 1-2 млн теңге арасында. Сонда қала бір тәулікте салық түсімінен келетін 67 млн теңгеден қағылып отыр, дейді бастамашыл топ өкілдері.