Рет қаралды 16,289
Бибимбапын нэг давуу тал нь ямар ч ногоо ашиглаж болно. Хөргөгчөө цэвэрлэнгээ, байгаа ногоогоороо маш АМАРХАН бөгөөд АМТТАЙ бибимбапаа хийж идээрэй.
1. Будаагаа ердийн будаа агшаах аргаар агшаана.
2. Үхрийн махаа алимны цуу, соя соус, сахар, перц, гүнжидийн тостой сайтар холиод таглан, хөргөгчинд 30 минут байлгана. Ингэснээр мах зөөлөрч, гоё амттай болно.
3. Нууц соус: алим, сонгино, сармис, сахар, лимоны шүүс, гочужанаа холиод блэндэрдэнэ. Энэ нь илүү амттай болдог ч хүсвэл гочужанаа дангаар нь соусаар хэрэглэж болно.
4. Ногоогоо дан дангаар нь гүнжидийн тосонд чимх давстай хуурч болгоно. Дуяаг буцалж буй усанд 2 минут хийж болгоно. Түүхийгээр нь бас идэж болдог.
5. Махаа хуурч болгоно.
6. Зориулалтын чулуун аягаа гүнжидийн тосоор тослоод, плиткэн дээрээ тавина. Болсон будаагаа хийгээд, ширүүн гал дээр тохируулна.
7. Одоо ногоо болон махаа дээр нь өрнө. Бараан өнгөтэй ногооны хажууд цайвар өнгийн ногоо гэх мэтээр алаглуулан тавих нь гоё харагддаг.
8. Дээрээс нь соусаа хийгээд, нэг талаар нь шарсан өндгөө тавиад боллоо.
9. Будаа нь доороо түлэгдэн гоё амт оруулдаг бөгөөд хэр удаан гал дээр байлгаж, түлэхийг өөрөө шийднэ.
Жич: ийм зориулалтын аягагүй бол будаагаа энгийн аяганд хийгээд, шууд идэж болно оо. Бас л гоё болно.