Рет қаралды 91,742
Biləsuvar rayonunda aqrar bölmənin digər sahələri kimi, heyvandarlığın inkişafı üçün də geniş imkanlar yaradılıb. Prezident İlham Əliyevin ölkəyə iribuynuzlu damazlıq heyvanların idxalı və bu heyvanların yerli fermerlərə 50 % güzəştlə lizinq yolu ilə satışının həyata keçirilməsi üçün ayırdığı vəsait bu sahənin inkişafına təkan verib.
Biləsuvar rayonunda ərzaq təhlükəsizliyi ilə bağlı tədbirlər çərçivəsində heyvan mənşəli məhsulların istehsalının daha da artırılması və cins iribuynuzlu damazlıq heyvanlara olan tələbatın ödənilməsi əsas prioritetlərdəndir. Bu məqsədlə Biləsuvar rayon İcra Hakimiyyətinin başçısı yanında prezident İlham Əliyevin kənd təsərrüfatı ilə bağlı Sərəncam və tapşırıqlarından irəli gələn vəzifələrin operativ icrası məqsədi ilə Kənd Təsərrüfatının İnkişafına Dəstək Komissiyası yaradılıb. Heyvandarlığın inkişaf etdirilməsi ilə bağlı böyük potensiala malik olan Biləsuvar rayonunda süni mayalanma yolu ilə iribuynuzlu mal-qaranın cins tərkibinin yaxşılaşdırılması məqsədi ilə dövlət dəstəyi ilə xaricdən lizinq yolu ilə mal-qara gətrilib. Hazırda rayonda fərdi təsərrüfatlardan əlavə 2 heyvandarlıq kompleksi yaradılıb. Heyvanlar arasında aparılan süni mayalanma tədbirlərini genişləndirmək məqsədilə süni mayalanma məntəqələrinin sayı bütün rayonu əhatə etməklə artırılıb. Davamlı olaraq məntəqələr yüksək məhsuldar törədici toxum və digər ləvazimatlarla təmin olunub.
Yusif Bağırov - sahibkar
“99 baş qara mal gətirmişik. Qara mal xüsusi bəslənmə şəraitində saxlanılır, yemlənilir və süni mayalanma yolu ilə artırılır. Gətirdiyimiz dövrdən son iki ildə mal-qaranın sayın 256 başa qədər artırmışıq.”
Rayonun təbii şəraitinə uyğun olaraq, əsasən südlük “holşteyn” cinsindən olan damazlıq inəklər, ətlik “şharole”, “limuzin” və “smental” cinsindən olan danalar gətirilmişdir. 50 hektar ərazidə inşa olunan kompleks sağım sexində yüksək standartlara cavab verən avadanlıqlar tətbiq edilib. Yeni texnologiya hər inəkdən sağılan südün həcminin, yağlılıq dərəcəsinin və digər keyfiyyət göstəricilərinin ayrı-ayrılıqda qeydiyyatının aparılmasına imkan verir. Kompleksin yemlə təmin edilməsi məqsədi ilə rayonda yem təsərrüfatı yaradılıb və yem bitkiləri əkilib. Bundan başqa, 60 hektar ərazidə yem təminatının yaxşılaşdırılması məqsədi ilə müasir suvarma sistemləri quraşdırılıb. Görülən işlər hesabına kompleksin yem təchizatı tam təmin olunub.