Рет қаралды 32,361
Биылғы қыста жүз жылда болмаған аяз келеді деген ақпарат шындыққа жанаспайды. «Қазгидромет» өкілдері осылай деп отыр. Айтуларынша, елдің батысы мен оңтүстігінде желтоқсан айына дейін ауа температурасы -5, -15 градус шамасында сақталады. Ал солтүстік, шығыс және орталық өңірлерде бұл кезеңде максималды температура -30 градус болады. Қыстың нағыз ызғары ақпан айында болады деп болжануда. Бірақ сақтықта қорлық жоқ деген бар. Синоптиктердің жорамалына қарамастан, еліміздің жолшылары қарлы бұрқасын мен көк тайғаққа әзірлікті бастап кетті.
«Абайлаңыз жол тайғақ», «ауа райының қолайсыздығына байланысты трасса жабық» деген смс-хаттардың мазалайтын кезі алыс емес. Синоптиктердің болжауынша, қыс қылышын Қазақстанға биыл қарашаның ортасында сүйреп кіреді. «Қазгидрометтіктер» он бірінші айдың ортасында солтүстік, шығыс және орталықта түнде температура -30 , ал күндіз - 15 ке дейін түседі деп болжады. Сынап бағанасы осы кезеңде оңтүстік пен батыста да төмен түседі.