چیرۆکی گیان لەدەستدانی ژنەکۆچبەرێکی کورد لەڕێگای ئەوروپا

چیرۆکی گیان لەدەستدانی ژنەکۆچبەرێکی کورد لەڕێگای ئەوروپا
هاوسەرەکەی دوو کاتژمێر تەرمەکەی لە دارستانەکاندا بە کۆڵداداوە
جارێکی دیکە کۆچبەرێکی کورد لەڕێگاى سەخت و پڕ مەترسی کۆچبەری و گەڕان بەدواى ژیانێکی شایستەدا، بوو بە قوربانی و مەرگ خەون و ئاواتەکانی لەگۆڕنا.
ئەمە جەستەى بێ گیانى مێهری نەبی زادەی تەمەن ٢٧ ساڵە بەسەر شانى هاوسەرەکەیەوە، کاتێک لەگەڵ هاوسەر و دوو منداڵەکەى بە ئومێدی ژیانێکی شایستە لە سەردەشتی ڕۆژهەڵاتى کوردستانەوە، ڕێگاى سەخت و مان و نەمانی تاراوگە دەگرنەبەر، لە ڕێگادا مێهری هێزی لێدەبڕێ و بەهۆی ماندویەتییەوە، توشی جەڵتەى دڵ دەبێت و گیان لەدەستدەدات، لە ئێستاشدا هاوسەر و دوو منداڵەکەى لە کەمپی فلایکۆ لە یۆنان لە دۆخێکی نالەباری دەروونیدا ڕاگیراون.
سەبارەت بە ڕووداوەکە، سەردار ئیبراهیم نەژاد، هاوسەری ئەو ژنە بە ڕێکخراوی هەنگاو بۆ مافەکانى مرۆڤی ڕاگەیاندووە، لە ڕێگای وشکانی نێوان یۆنان و تورکیا، هاوسەرەکەى بەهۆی ماندوویەتی لەڕادەبەدەرەوە توانای ڕێکردنی نەماوە، ئەو کەسانەش کە لەو سەفەرەدا لەگەڵیان بوون ئەوانیان بەجێهێشتووە، دەشڵێت لەو بارودۆخە سەختەدا دواجار هاوسەرەکەى توشی جەڵتەی دڵ بووە و لە پێش چاوی خۆی و دوو منداڵەکەی دوایین هەناسەکانى ژیانى هەڵکێشاوە و گیانی لەدەستداوە.
وەک خۆی دەڵێت، سەردار ئیبراهیم زیاتر لە دوو کاتژمێر تەرمی هاوسەرەکەى لەکۆڵ گرتووە و لەگەڵ دوو کچەکەی کە تەمەنیان لە نێوان چوار بۆ حەوت ساڵیدایە، بە دەم گریانەوە دارستانەکانی یۆنانیان بڕیوە، تا کەسێکیان بینیوە و پەیوەندی بە پۆلیسی ئەو وڵاتە کردووە.
لە ئێستاشدا داوا لە ڕێکخراوەکانی مافی مرۆڤ دەکات یارمەتییان بدەن بۆ گواستنەوەی تەرمی هاوسەرەکەى بۆ سەردەشت و گواستنەوەی منداڵەکانی بۆ وڵاتی سێهەم و ڕێگری بکەن لە دیپۆرتکرانەوەیان بۆ وڵاتی تورکیا.