Coodtiigu : Baaba Maal e Ibraahiima Saar

Delliyaa (Coodtiigu)
Awluɓe koy muumɗii
Ɓoggi kolli taƴii
Yimooɓe ngumbalaa
Ottii kono ɓe ndonkii
Dono Gellaay
Uumii soko laaɓaani
Haaltooɓe ñaam-golluuje
Etiima kono timmaani
Wayreende waɗii
Ɗo pittaali coodtiraa ndimaagu
Wayreende waɗii
Ɗo Koli Teŋŋella siftoraa
Wayreende waɗii
Ɗo Ceerno Suleymaan Baal ñemtinaa
Wayreende waɗii
Ɗo Abdul Kader Kan yeeɓaa
Wayreende waɗii
Ɗo Umarul Fuutiyu ñihaa
Ñalnde jeegom Desaambr
Tawi hitaande nde naywii
Saanga nde jamma waylii
Ndoogu riiwti niɓɓe
Gertooɗe njoggani joom haaju
Jamaaji ceedtinani juulooɓe
Sagataaɓe njani e leydi
Leydi tuɗɗiiɓe leppi teddungal
Ɓernde taƴii to Wocci e Waalalde
Banndam en
Juuwdi Jaaɓe Jaaɓi Haayre Mbaara
Fuuta fof hawrii
Gorooje tati ɓaleeje
Coodtiiraama ndimaagu
Gidimakha haa Waalo Barak ceedtiima
Coodtiigu ndimaagu timmii
Seydi Bah Saar Aamadu Saydu Sih
Mbaɗii ɗo wayreende
Ñalnde jeegom Desaambr
Nde hitaande nde yehi haa naywi
Ruulde hesere ƴoogi moƴƴere tommbaande
Saanga nde jamma yehi haa naywi
Ndoogu riiwti niɓɓe
Awluɓe koy muumɗii
Ɓoggi kolli taƴii
Haaltooɓe ñaam-golluuje ngaanii
Yo Bajjo yaafo ɓikkon Mayram Mammadu
Kam e Dimo Sammba
Dimo diccii jibini rimɓe
Gorooje tati ɓaleeje
Coodtiraaɗe ndimaagu
Saydu Sih Saar Aamadu Seydi Bah
Ndimaagu ndiftanoongu
Nde laamu koloñaal dooki
Laamu huutoriingu leñam-leñamaagu
Fecci juulɓe waɗi heedi-heeda
Lomtini haasideeɓe semmbini lomtiiɓe
Ndeen neɗɗaagu men wujjaa
Neɗɗaagu men tikñaa
Gannde men njeddaa
Faayiida men yaɓɓaa
Nammandiir Gaana Tekruur hanki
Leydi gannde toowɗe
Ƴoogaaɗe to Kemet
Leydi Menes Tutankhamon
Kañ e Akhenaton
Leydi gannde Lislaam
Ƴoogaaɗe e ɓuraana kañ e ɓurnaaɗo
Leydi waliyaaɓe e jaambaareeɓe
Leydi Saar Aamadu Seydi Bah Saydu Sih
Kawtal Eeleege jeertinii
Kono hay dara teskaaka
Ñalngu capanɗe jeegom hollinii
Kono hay batte waɗaaka
Doccotte keewii fooyre fitina ooynii
Kono hay huunde ummanaaka
Nay jeenay arii
Lew-lewndu sumii ñoomre
Ñaamon puŋŋiniima ɗo suuɗee alaa
Kono hay dara faaynaani
Noogaas e ɗiɗi Octoobar
Fiyannde moccii moccaani
Goomu koninkooɓe kurum
Tiggital ngal dow
Leɗki ɗuggittee ko e ɗaɗol
Waree maaya pak
Ndimaagu artiree leƴƴi ponndee
Dono Baabo Yero Daali
Jaaltaaɓe wuro Jeeri jiimti e Waalo
Wiy ko kañum tan tey
Haayre Mbaara ko dañi ko weeɓaani
Saydu Sih waɗii ɗo wayreende
Dono baaba mum
To Juuwde weli Jeeri
Juuwde Jeeri Juuwde Waalo
Juuwde hakkunde maaje
Ɓinngel Dimo Sammba
Wiy yo woppe ina waɗta laaɓaani
Dono Muusee Deebaaye joom caaje
To Baga Lammbaa jaraa jaasaa
Seydi Bah hono mum weeɓaani
Fiyannde mon moccii moccaani
Ko wirtii barmini so fiɗii likñitto
Gorooje tati ɓaleeje
Coodtiraaɗe ndimaagu
Ko Allah wiy
Yimɓe fof poti
Ɓurɗo hulde-mo ɓuri
Haasideeɓe njeddi
Allah wiy
Juulɓe fof ko musiɗɓe
Añam-leñamaaɓe calii ɗuurnii
Allah wiy
Juulɗo yo yiɗan juulɗo banndum
Hono ko yiɗani hoyre mum ko
Huɗaaɓe meernii njattinii
Allah wiy
Ɓaleejo ɓuraani boɗeejo
Boɗeejo ne kay ne ɓuraani ɓaleejo
Bonɓe lorooɓe canɗolini
Jihaadi waɗɗiima
Saydu Sih Saar Aamadu Seydi Bah
Wayreende waɗii
Ñalnde jeegom Desaambr
Nde pittaali coodtiraa ndimaagu
Wayreende
Naamndii ko warñeende
Haa ɓalli toɓa baade
Ɗi mon toɓii ƴiiƴam
Wisraama leɗki potal leƴƴi men
Ki wiifnoo diine men ƴellitoo
Ibraahiima Saar e kuɗol IOS

[@DIASADA92]

❤❤WAALAY DEÉYSSAN 😢 ALLAHOUMA RAHMAHOU À TT NOS MORTS INCHALLAH. OUII LA VIE EST SOUVENT DRÔLE EST CRUELS . 89 & INOUBLIABLE 🙏

[@aboudiallo9508]

Le comble de l'émotion !!!

[@alousseynousy3842]

Paix a leurs âmes

[@baidysoumare5518]

Ndyissane adouna

[@issasow-qb9kl]

Issa

[@DemmbaKah1363]

Saaw