Рет қаралды 11,331
Қызылорда облысы Қармақшы ауданының тұрғындары перзентханадағы акушерлер мен гинекологтардың жұмыстан кетуін талап етіп отыр. Айтуларынша, перзентхана дүниеге сәби сыйлайтын шаттық мекемеге емес, аналар үшін ажал аялдамасына айналып барады. Мәселен осыдан екі апта бұрын дәл осы перзентханада босануға өз аяғымен келген 35 жастағы келіншек қайтыс болыпты. Ал мұндай қайғылы жағдайларға ең басты себеп дәрігерлердің салғырттығы мен білімсіздігі дейді тұрғындар.
Сәуірдің соңында босануға өз аяғымен келіп табыты шыққан Жадырасын Аманжолованың туыстары перзентхананың алдына жиналды. Олар мұның бәріне кінәлі осындағы дәрігерлер деп есептейді.
Мына портреттегі марқұм Жадырасын Аманжолова сәуірдің 22-сінде айы-күні жетіп, перзентханаға келіпті. Туыстарының айтуынша оған дейін келіншектің денсаулығы жақсы болған. Алайда босану сәті қиын болса да, дәрігерлер тиісті ем-домды жүргізбеді дейді. Соның кесірінен 35 жастағы келіншек үшінші баласына босанған кезде алты күн ес-түссіз жатып, перзентхана төсегінде қайтыс болыпты.
ҚҰРАЛАЙ АМАНЖОЛОВА, марқұмның сіңілісі:
- Бұл кісілердің айтуынша Жадыра өзі кінәлі дейді операцияға рұқсат бермеген. Жамбаспен келіп тұрғанын біліп тұрып, операция қылатын реттері негізі. Ал бұлар оны жоққа шығарып отыр. Бізге түнде үште жүріп кетті деді. Ал бізде выпискада бергенде уақыты 1,5-да деп тұр. Күдікті жағдай уақыттары сәйкес келмейді.
Ал Айым Сырымбетова дәл осы перзентханада босануға келген бір емес, екі бірдей келінім де сәбиінен айырылды деп ашынады. Тіпті бірінің жатырын кесіп тастаған да осы перзентхананың дәрігерлері дейді.
АЙЫМ СЫРЫМБЕТОВА, Қармақшы ауданының тұрғыны:
- Жастардың бәрі осылай болып қала бере ме? Мұның бәрін қарау керек. Нысанбаев Бақытжаннан бастап бәрі қаралсын.
Ал ауданның бас дәрігері марқұм Жадырасынды аман алып қалу үшін қолымыздан келгенді жасадық деп отыр. Айтуынша 35 жастағы келіншектің қайтыс болуына араға сегіз жыл салып бала көтергені мен көзінің нашар көретіндігі себеп болуы мүмкін. Алайда сараптама қорытындысы әлі шықпапты. Ал Айым Сырымбетованың келіндері жүктілік кезінде дұрыс күтінбеген дейді ақ халатты.
БАҚЫТЖАН НЫСАНБАЕВ, Қармақшы аудандық ауруханасының бас дәрігері:
- Емделмегеннің әсерінен болып тұрған түсік. Ол бүгін болмағанымен, ертең болатын еді инфекцияның әсерінен. Түсік тастаулар көп. Өйткені туу мәдениетін үйренуіміз керек.
Түсік тастау жағдайларының жиілеп кеткенін айтқан ақ халатты перзентханадағы ана өліміне қатысты қызметтік тексеріс жүргізіледі деді. Ал қапыда қара жамылған жанұя перзентхана дәрігерлерінің ісін құзырлы органдар қарап, тиісті жаза қолданылса екен дейді.
Абай Нұржанұлы, Рахымжан Ысқақов
Бізді әлеуметтік желіде оқыңыздар:
KZbin - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#перзентханадағы_өлім #ақхалаттылар #кім_кінәлі