احد اساليب التلاعب النرجسي "الغباء المزيف"

رقم حجز الاستشارات وكورس كوني ملكة : ٠٠٢٠١١٥٠٥٨٦٠٥٢
النهاردة حقول لك حركة من حركات النرجسي اللي ممكن تفضل تتعمل فيكي سنين طويلة وانتي ماتفهميهاش وكل مرة تنخدعي وتقولي دة عامل زي الطفل مش فاهم حاجة ،ولأنه أحيانا بيكون ساذج وبينضحك عليه فدة بيؤكد لك انه فعلا زي الطفل فيه حاجات مابيفهمهاش ،وهو أصلا بيكون قاصد يدعي عدم الفهم وبيستخدم تكتيك الغباء المزيف ودة يعتبر من ضمن الاعيب النرجسي الخبيثة اللي بيستخدمها معاكي
النرجسي بيعتمد على الغباء المزيف عشان يخرج نفسه من المشاكل او يهرب من غلطة عملها ، ازاي الكلام دة؟
يعني يتصرف تصرف غير أخلاقي تماما معاكي او مع غيرك ولما تراجعيه يقول لك عادي انا اتصرفت عادي جدا زي مثلا انه يكون عندكم ضيف اول مرة يزوركم ويقابله بالبيجامة عادي جدا ويقول لك انا في بيتي وبراحتي مافيهاش حاجة ، او انه عريس بنتك يقول له انه جاي يقابله وهو يخرج ويسيبه ييجي وهو مش موجود ومفيش راجل في البيت وعادي جدا يقول لك فيها ايه هو مش حياكلكم ، او انه يدخل عليكي عامل صيانة وانتي في المطبخ بدون حجاب ويقول لك انتي عارفة انه جاي النهاردة فتعملي حسابك ، او انه يقول كلمة بايخة لمامتك ويقول لك عادي انا ماقلتش حاجة غلط وكل دة هو فاهم كويس انه غلط لكن هو بيدعي الغباء وبيدعي انه مش فاهم ، والمصيبة بقى انه بيعمل كدة بتمثيل يعني بشكل مليان براءة ويبين لك انه مستغرب من رد فعلك ويقول لك انتي ازاي بتقولي كدة انتي مش طبيعية انتي عايزة تعملي مشكلة وخلاص وانتي طبعا تنفعلي وتقولي له نحكم حد يقول لك لا انا ماحكمش حد والمشكلة فيكي وتبقى فرصة كويسة ياخد وقود سلبي ، من ضمن المواقف اللي النرجسي بيعمل كدة فيها حالة بتقول صديق جوزها النرجسي نرجسي هو كمان ومصاحب زميلته وجوزها والزميلة دي جوزها بيسافر دايما وهو بيروح يسأل عليها وعلى أولادها وعرف النرجسي ع الاسرة دي وبدأ ياخده معاه يزورها ويسأل عليها في عدم وجود زوجها ، في نفس الوقت هي الحالة بتقول انه ممنوع عليها ان زملائها في الشغل يتصلوا عليها أصلا تليفون ، يعني هو مش اوبن مايند ولا حاجة ولا معترف بالصداقة بين الجنسين ولا حاجة يبقي ازاي موافق يروح يزور الزميلة دي في بيتها وفي عدم وجود جوزها ولما هي اعترضت يقول لها عادي ايه المشكلة احنا بنزورها زيارة رسمية والست محترمة وابنها موجود ايه المشكلة ، وبيبين لها ان دة عادي وانه طبيعي ولما تقول له دي لا تقاليدنا ولا دة من الأصول ودة تصرف انت ماترضاش اني اعمله ازاي انت بتعمله ،يستنكر كلامها تماما ويدعي انه شايف انه عادي جدا ومش غلط ومفيهوش أي مشكلة وبيكون بيتكلم برضه بمنتهى الثقة ان زوجته هي اللي متزمتة وهو شايف ان دة تصرف غير مناف للعادات والتقاليد والأصول فهو النرجسي كدة بيدعي الغباء وبيدعي انه مايعرفش الأصول والاخلاقيات ، ولما يكون بيشتغل زميلته المطلقة ويعلقها بيه ووقت مايحس انها وقعت في شباكه وتلمح له بالجواز يهرب ولما حد يقول له حتتحاسب يقول انا ماعملتش حاجة انا ماقلتلهاش بحبك ولا وعدتها بحاجة انا مغلطتش ولا عملت حاجة حرام ،
الأسلوب دة لما بيتعمل فيكي بعد ما ادمنتي النرجسي بيعمل لك تنافر معرفي وبيعمل تشكيك في معتقداتك و القواعد اللي اتربيتي عليها وبيعمل لك تشكيك في ذاتك اللي اتكونت من المعتقدات والقواعد دي وتبقي مشتتة ومش عارفة هو انا اللي صح ولا هو ، هو فعلا اللي بيقوله دة كلام مظبوط ولا اللي انا اتربيت عليه هو اللي مظبوط ،
حبيبة قلبي النرجسي فاهم كويس جدا الغلط من الصح وعارف الأصول كويس جدا والدليل على كدة انه مش بيعمل التصرفات المشينة دي ادام حد يهمه وعشان كدة لما بتقولي له نحكم حد يقول لك لا وماتدخليش حد بيننا ولو دخلتي حد وحكمتيه ييجي بعدها يقول لك فضحتيني ،يعني هو فاهم كويس جدا انه غلط بس بيدعي الغباء