Дархан ТҮМЭН ургийн номын нээлт

Хуран чуулсан ахан дүүсдээ энэ өдрийн мэндийг хүргэе. Үрээс үрд өвлөгдөж үлдэх учиртай үнэт зүйлсийн нэг нь ургийн хэлхээ, түүнийг танин мэдэх билээ.
Энэ зорилгын хүрээнд Т.Сэрдамбын том хүү С.Бат-Эрдэнэ агсаны санаачилгаар эхлүүлсэн ажил өнөөдөр биелэлээ олж, “Дархан Түмэн” овгийнхоо нэгэн бичээсийг эмхтгэн та бүхний гар дээр тавьж байна.
Монголчууд нутгаас нутаг сэлгэж, нүүдлээс нүүдэл дамжсаар ирсэн хэдий ч удмаа таних, ургаа сонгох үйл явцад машид ач холбогдол өгсөөр ирсэн. Есөн үе дотроо ураг холбохгүй байхын тулд ургийн бичгээ сайтар хөтөлж, чухалчлан нандигнасаар ирсэн уламжлалтай.
Энэ уламжлалын дагуу ахан дүүс та бүхнийг энэ үйл хэрэгт татан оролцуулж, уулзан танилцахаар өнөөдрийн уулзалтыг Төмөр-Очирын Сэрдамбын үр хүүхдүүд, ач зээ нар хамтран зохион байгуулж байна.
Өнөө жил төрөлх нутаг Ховд аймгийн Дарви сумын маань 100 жилийн ой тохиож байна. Мөн “Дархан түмэн” номын нээлт, Түмэн овогт ахан дүүсийн танилцах уулзалт, өвөө Сэрдамбын 88 насны ой гээд олон сайхан баярт үйл явдал давхцаж байна.
Монголын төдийгүй олон улсын тавцанд ямагт алдар цуугаа цуурайтуулсаар байдаг Дарви сум бол өөрөө эрдэмтэн, судлаач, алдартан суутны өлгий билээ.
Бид өнөөдрөөс эхлээд өрх бүр түүхээ хөтөлж, өвөг дээдсийнхээ сургаал захиас, уламжлан ирсэн арга ухааныг өртөөлөн тээх, өвлүүлэн үлдээх эрхэм үүргийг хүлээж байна.
Өнөөдрийн үйл ажиллагааг зохион байгуулж буй дүү нар, ах эгч та нартаа баярлалаа. Хүрэлцэн ирсэн Түмэн овогтон ахан дүүстээ гялайлаа.
Гэрэл гэгээ, хүсэл мөрөөдлийг даллан дуудагч, Сутай хайрхандаа мөргөмүй.
Бас аав таньдаа мөргөмүй.
Баярлалаа та бүхэндээ...
Хүндэтгэсэн: Түмэн овогт Б.СУВД