16-fevral voqealarida qatnashgan jinoyatchini ushlash vaqtida qoʻlidan ayrilgan serjant hikoyasi

Kichik serjant Isoqjon Jamolov bundan 23 yil avval, 1999-yilning 27-aprel kuni xalqaro qidiruvdagi ekstremist, Tojikistondan Oʻzbekistonga kelgan ashaddiy jinoyatchi Abdulxafiz Umarovni qoʻlga olish vaqtida jiddiy jarohatlangan. Maʼlum boʻlishicha, jinoyatchi Toshkentdagi 1999-yil 16-fevral voqealarida ishtirok etgan va chet elga qochib, yana ortga qaytgan. Maxsus xizmatlar tomonidan uyiga qaytgan jinoyatchi haqida xabar topib, uni zudlik bilan qoʻlga olish choralari koʻriladi. Jamolov jinoyatchini ushlagan payti ekstremist qoʻlida boʻlgan jangovor granatani portlatib yuboradi. Natijada Jamolov qattiq yaralanadi, jinoyatchi esa voqea joyida vafot etadi. Jarohat sababli Jamolovning chap qoʻlining bilak qismi va kaft boʻgʻini, oʻng qoʻlining toʻrtta barmogʻi olib tashlangan.
“Daryo” nashri 22 yoshda nogironga aylanib qolgan Jamolov bilan, uning ishdan ketishi, oila qurishi va bugungi hayoti haqida suhbatlashdi.