“Demokratët pa shtyllë kurrizore, Harris një kostum bosh”, analistët japin arsyet e fitores së Trump

Studiuesi i njohur Auron Tare, në një intervistë me Skype në emisionin Open në News 24 tha se vota masive popullore në SHBA ishte kundër politikave ekstreme të majta.
Ai tha se amerikani i thjeshtë e gjeti veten tek politikat e Donald Trump.
“Vota masive popullore ka qenë kundër politikave ekstreme të majta. Unë kisha bindjen e plotë që Trump do rikandidonte dhe do të fitonte.
Amerikani i thjeshtë nuk është se shikon shumë luftën në Ukrainë, por jetën e përditshme. Amerikani shqetësohet pse taksat e tij shkojnë për armatimin e Ukrainës. Amerikani i thjeshtë e gjeti veten te politikat e Trump”, tha Auron Tare, studiues.
Eksperti i marrëdhënieve ndërkombëtare, Klejdi Këlliçi, i ftuar në emisionin Open në News 24 tha se Ukraina mbetet një bast tepër i fortë edhe për Donald Trump.
Këlliçi u shpreh se e shikon të vështirë zgjidhjen e thjeshtë në Ukrainë. Sipas tij, zgjidhja në Lindjen e Mesme do të jetë e vështirë. Ai tha se gjërat në këto dy pika konflikti mund të qetësohen, por mund të kalohet ndoshta edhe në ndërhyrje ushtarake.
Ledion Krisafi, ekspert i marrëdhënieve ndërkombëtare, duke komentuar zgjedhjet në SHBA, tha se demokratët shkuan shumë majtas.
Në emisionin “Open” në News24, Krisafi tha se SHBA po shkonte shumë majtas me administratat demokrate dhe kjo solli këtë reagim, përfshi këtu edhe atë të votuesve hispanikë.
“Demokratët kishin humbur lidhjet me klasën e mesme, apo me klasën punëtore në SHBA. Iu dha një shuplakë këtij establishmenti pikërisht sepse pati një largim të madh të demokratëve ndaj shtresa e mesme”, tha Krisafi.
Në emisionin “Open” në News24 është diskutuar mbi zgjedhjet në SHBA, ku Donald Trump, kandidati i Republikanëve, fitoi bindshëm garën presidenciale përballë Kamala Harris, zv.Presidentes dhe kandidates demokrate.
Menada Zaimi, gazetare pranë Zërit të Amerikës, në një lidhje Skype me emisionin, duke folur për fitoren e Trump, tha se mesa duket të gjithë shqetësimet e ngritura nga kampi republikan kanë rezonuar te votuesit amerikanë.
“Sondazhet nuk kanë gabuar lidhur me çështjet që shqetësojnë amerikanët. Kishte një shqetësim për rritjen e çmimeve, jo vetëm te ushqimet.
Në anën tjetër, Kamala Harris, duke mos pasur kohë në dispozicion, nuk arriti të shpalosë vizionin e saj.