Депутаттың нәтижесі. Еділ Жаңбыршин

Еділ Терекбайұлы Жаңбыршин - парламент Мәжілісінің депутаты. «Аманат» партиясының мүшесі. «Геоэкология» мамандығы бойынша техника ғылымдарының докторы, доцент. Білім беру саласында жетекші маман, жоғарғы оқу орындарында басшылық қызметтерде болып, «Маңғыстау облыстық «Қазақ тілі» қоғамы» бірлестігін де басқарған. Маңғыстау облысының маслихат депутаты болды. Жекеменшік компанияларда қызметте болып, облыстың табиғи ресурстар басқармасының басшысы қызметін атқарды. 46 жасында Ақтау қаласының әкімі креслосына отырады. Жаңбыршин Ақтау қаласын 2012-2015 жылдары басқарды. 2021 жылғы Парламенттік сайлауда партиялық тізіммен депутат болу бағы қонады. Еділ Жаңбыршин Мәжілістегі «Жаңа Қазақстан» депутаттық тобының тең төрағасы ретінде елордаға «Астана» атауын қайтаруды ұсынғандардың бірі. Алайда жағдай депутаттар күткендей болмады. Олардың бастамасы қоғамда әбден сыналды. Қала атауын ауыстыру үшін қыруар қаржы кетеді, ол шығынды депутаттар өз қалтасынан төлесін деген сындар айтылды. Дегенмен депутаттық топтың бұл ұсынысы қолдау тауып, Астана атауы қайта оралды.