二刷後的長文感想👇 導演夫子自道嘅自傳作品,與其他熱血追夢嘅故事不同,呢部電影不但不熱血,反而如實地反映追夢者背後所遇到嘅辛酸與現實殘酷嘅真相,然而,這卻是電影最好看的地方,「我淨係想去一個唔會懲罰夢想嘅地方」,相信每個觀眾都一定有共鳴。 人冇夢想,同條鹹魚有咩分別?然而,電影告訴我們,追夢的意義不在於一定要達到夢想,而是要學習享受其中嘅過程,因為當中所遭遇到嘅人與事,都一定令你有所得著,有所成長,即使最後唔成功,夢想沒有達到,努力看似白費,唔緊要,正如積尼高遜喺飛越瘋人院中所講: At least I've tried,這樣一來,當你回望過去,你就不因庸碌一生,虛度光陰而感到後悔。 電影將喜劇,勵志,寫實三種元素共冶一爐,同時配以描寫填詞行業嘅文化,橫切香港社會環境不利追夢的一面,令觀眾覺得有趣,又有共鳴。L一字有很多意思,導演莊文強睇完戲之後認為,L可以解做learning,佢話呢部電影係一部講在人生中學習的電影,電影教我們學習如何享受,享受歡樂,享受痛苦,我覺得呢個解讀與電影最重要嘅兩場不謀而合,其中一場係羅穎詩阿哥結婚,要搬走,臨上車前同佢講嘅一句「點解做programmer唔打得波啫?一定要NBA先打得波㗎咩?興趣嚟啫」,另一場就係結局,女主角終於學會享受追夢過程嘅喜與悲,而非著眼個結果,鍾雪瑩嘅演出形神俱備,在正經與搞笑之間收放自如,張弛有度,能夠演出角色複雜嘅層次,下個月金像獎,絕對有能力問鼎影后寶座。 另一場拍得特別好的是阿詩被楊偉倫炒魷魚之後,上小巴淒然淚下嗰場,呢場戲可以話係女主角追夢歷程以來被傷害得最嚴重嘅一場,不但親手斷送只有一步之遙,能夠真正成為填詞人嘅機會,仲被人質疑自己嘅才華同努力,她斷然反擊 (我冇努力呀),但係上到小巴,佢終於都要承認自己嘅填詞夢真正打碎了,因此再也承受不了,不禁傷心落淚,呢場女主角首先係茫然,不知所措,然後轉為失望,憤怒,到最後淒然淚下,很欣賞導演沒有將女主角嘅情緒寫成呼天搶地,大哭大鬧,現在嘅設計,更能令觀眾感受到女主角嘅失望,無奈,傷心,痛苦,令觀眾更加感動,眼淚不自覺地在眼眶打轉,鍾說在呢場嘅情感拿捏得非常到位,然後,世故嘅肥乜一句淡然嘅安慰「唔緊要啦」勝過千言萬語,同時令人更加唏噓,後來女主角去梁仲恆間公司應徵,被問及最想做嘅事,佢答: 「我想做填詞人,不過,太難喇」嗰場,無力感更重,儘管調子很灰,結局究竟係喜定悲,導演亦沒有明示,然而Ending呢場筆鋒一轉,將客觀失敗嘅事實,扭轉成肯定掙扎過程嘅成果以及個人嘅身份認同,儘管前路未明,我相信,發展一定係正面嘅,所以,睇到ending嗰場,女主角終於釋懷,我係替阿詩感到高興的,導演在呢場更以漫畫化的方式閃回女主角追夢過程的喜與悲,設計真巧妙。 電影很寫實,睇到令人流眼淚,同時不乏喜劇場面,真正係笑中有淚,而且笑料大多集中喺前段,即係女主角嘅求學時期,導演設計得很有心思,因為呢個恰巧與現實一樣,童年時我們大都是快樂的,成年後所面對的,大部分卻是痛苦與挫敗,但正正係要經歷過失敗同痛苦,我哋先會有所成長,冇結果唔緊要,as least I've tried,這就已經無憾了。 電影亦有大量大cast客串,最令人驚喜嘅係0243填詞法發明人黃志華,對於我呢啲聽七八十年代舊歌長大嘅觀眾,見到佢出現,份外親切。 活在懲罰夢想的地方,唔緊要,我身雖陷囹圄,我心依舊自由,hope can set you free,呢套戲與月黑高飛有異曲同工之妙,what a film,多謝導演拍到出一套平實,清新,細膩,同埋咁有意義嘅佳作