(دورتك بليل )

دورتك بليل يالماخذ الحيل
يم النهر طايح گمر
گالولي حلوه ارسومه
گالولي طايحلچ اخو يم النهر تلگينه
مايرضى يعبرلچ سهم صد السهام ابعينه
گلتلهم الگاه يا كتر گالولي سمعي اونينه
لو ما عرفتيه بالشكل اتعرفينه من چفينه
غير الگه يمناك حته الگه يسراك
ضلمه وحجر يمك عثر
جدمي وطحت مهضومه
اتعنيتك بليل اهدعش والخطوه تسبگ خطوه
مشاني للماي الوصف عباس وينك فدوه
جيتك لچن اتحيرت ماگتلي زينب گوه
من شفتك بروحي گلت لو هوه لو مو هوه
متغير اهواي ماتحچي وياي
ياغيرتي ياتچوتي
حاچيني مو ملچومه
عباس متطشر صدگ جيت ارد اشوف اشلونك
ريحني بحچايه ولو ياراحة اشوف ابدونك
صد ليه هذا اخر نضر يابعد عيني عيونك
لوني انخطف ويطيحتك مو بس تغير لونك
مو طبعك النوم وين الله وتگوم
لمن رحت ادعي گمت
كون الله يبعد يومه
ماريد اچملنك وجع بس المن احچي حالي
مخنوگه من ذاكه الضهر من ضيعت چم غالي
يكفيني منضر حالتي لاتنشد اعله احوالي
هاي انه يمك من رحت حطو بديه احبالي
وين امشي ياصوب والفرگه چندوب
درب اليسر رايد ستر
وخواني كلهم نومه
لو بيدي ماعوفك ابد مو گلبي خويه العافك
صار العطش خوه وهجر ماتروى عيني اخلافك
اعمي عيوني لو ترد وعصرهن اعله اشفافك
عباس جابو ناگتي وين الكه خويه اجتافك
ياراعي الخيام وين اندل الشام
ياعازتك محتاجتك
ليل ويناغي انجومه
ليلة ابغيابك ياگمر من عمري هاي الليله
باقي الليالي لو لفت يسمعني من وابچيله
لو اضلم اعليه الوكت اگضيهه الم بالعيله
ماضل عضيد ابكربله ياهو الاگله ادخيله
اسمع حچي الناس لو ماكو عباس
غربه وسهر گلبي انكسر
والمچوي ياهو ايلومه
اول مسافه ابغربتي واحسبهه اخير ايا
باچر يحيرني الدرب ومشي ابعذاب الأمي
ما ادري وين انطي الوجه وعباس مو گدامي
بيد الي مايرحم طحت ذاك الحرگها اخيامي
باچر سبي اطفال واسم اختك انگال
حر الشمس بيه من امس
تعبني ركض الحومه
#شاكر الصيمري
t.me/bxnso