Рет қаралды 16,374
Ұзақ жылдар бойы берік достық пен шынайы түсіністік, өзара тілеулестік. Қасиетті Құрбан айт күні Ислам Каримовтің бейітінің басына гүл шоқтарын қойып, Құран бағыштаған Елбасы Нұрсұлтан Назарбаев көрші елдің бұрынғы басшысымен арадағы қарым-қатынасын осылай бағалады.
Мемлекет басшысы: «Қазақ елінің атынан бауырлас өзбек ағайынға көңіл айтып, өзбекстандықтардың келер ұрпағы Ислам Каримовті әрдайым есте сақтайды деп сенемін. Оның артта қалған мол мұрасын, мемлекеттік қызметінің нәтижелерін қазіргі ұрпақ зерттеп, атқарған істерін өзбек халқының тарихына алтын әріптермен жазады», - деді. Әріптесім Мұхтар Ыбырайымның репортажы.
«Қазақтан досың болса, жолдан адаспайсың»! Бұл - өзбек даналығы. Ал біздің жұрт: «Өзбекті өз ағам», - дейді.
Қуанышты бөлісіп, қиындықты бірге көрген жұрт екеуі де. Нұрсұлтан Назарбаев сол қиындықта ала шапанды бауырларға сүйеу болып барды. Қазақ елі қара жамылған ағайынның қайғысына ортақ.
Нұрсұлтан Назарбаевты Өзбекстан Президенті міндетін уақытша атқарушы Шавкат Мирзиеев әуежайда қарсы алды.
Елбасының қолдап келгенін жоғары бағалап жатыр мұндағылар. Достықтың һәм бауырластықтың белгісі. Ұшақтан түсе сала Қазақстан Президенті ұзақ жылғы үзеңгілесі Ислам Каримовтің бейітіне бет бұрды. Гүл қойып, өзбек елінің тұңғыш Президентінің рухына тағзым етті. Сапардың негізгі мақсаты да сол.
Елбасы: «Іргесі бірге жатқан екі елдің өркендеуі жолында Ислам Кәрімовтің орны бөлек», - деді.