Рет қаралды 15,478
Елімізде енді мемлекеттік және бюджеттік сала қызметкерлерімен бірге қарапайым жеке меншік кәсіпорындарда қызмет ететін азаматтар да баспана алуға кезекке тұра алады. Ол үшін он жыл бойы өз атында үйі болмауы керек. Үкімет тұрғын үй саясатын реформалау жөніндегі жаңа заң жобасын әзірледі.
Енді кез келген Қазақстан азаматы баспана кезегіне тұрып, бес пайыздық несиемен пәтер ала алады. Үкімет жариялаған жаңа тұрғын үй бағдарламасы баспанаға мұқтаж барлық Қазақстан азаматтарын үймен қамтуды көздейді. Бағдарламаға он жылдан артық өз атында үйі жоқ адамдар іліге алады. Ал депутат Ғазиз Құлахметтің айтуынша, қазіргі күні жарты миллионға жуық адам үйге мұқтаж. Олардың 400 мыңы әлеуметтік осал топтағы адамдар болса, 12 мыңы оқуын жаңа бітірген жас мамандар. Сондықтан қолжетімді баспанаға алуға барлығында бірдей мүмкіндік болуы керек деп есептейді.
Депутат баспана мәселесі қалалы жерлерде ғана емес, елді мекендерде де өзекті дейді. Мәселен, «Дипломмен ауылға» барғысы келетін жастар көп жағдайда тұрғын үй тауқыметіне тап болады. Сол үшін жас мамандарды ауылда жұмыс істеуге шақырған кәсіпкерлерді де үй салып беруге тарту керек. Мемлекет өз кезегінде шығынның жартысын өтейді дейді. Бұл заң жобасы қазір Мәжілістің қарауында. Ал Индустрия министрлігінің өкілдері бұл бағдарламаларды іске асыру үшін Отбасы банкін ұлттық оператор ретінде тағайындау көзделгенін айтады.
НҰРЖАН ДҮЙСЕНБАЕВ, ҚР ИИДМ ТҮКШ дамыту басқармасының бас сарапшысы:
- Ұсынылып отырған жаңа модельде тұрғын үй жағдайларын жақсарту жөніндегі мемлекеттік қолдау шаралары мен тұрғын үйді бөлу, есепке қою күніне және табыс деңгейіне байланысты жүзеге асырылатын болады.
Ал жылжымайтын мүлік федерациясынының президенті Ермек Мүсірепов несиенің жылдық пайыздық мөлшерлемесін үш пайызға төмендетуді ұсынады. Өйткені бес пайыздың өзі кейбір тұрғындар үшін қымбат дейді.
ЕРМЕК МҮСІРЕПОВ, Қазақстан жылжымайтын мүлік федерациясының президенті:
- Барлығына бір мөлшерде субсидия берілуі керек. Оны бір мемлекеттік оператор жүргізіп, бағдарлама арқылы берілетін пәтер құнының шекті мөлшерін бекіткен жөн. Әйтпегенде тұрғын үй нарығында осыны пайдаланатын алыпсатарлар көбейіп кетуі мүмкін.
Сарапшылар бұл заң жобасының әлі де жетілдіретін тұсы жетерлік дейді. Сондықтан бұл заң жобасының қашан қабылданатыны әзірге белгісіз.
Бізді әлеуметтік желіде оқыңыздар:
KZbin - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#жаңабағдарлама #баспана #ипoтека