Рет қаралды 39,629
Алматыда болған жер сілкінісінен соң кейбір тұрғындар далаға жеңіл киіммен шығып кеткен. Дүмпуден кейін бірден далаға шығуға ұмтылған жұрт қолына түскенін іліп, тезірек теңселген баспанадан жыраққа кетуге ұмтылды. Сонымен бірге түн жарымда мегаполистен шығатын негізгі жолдарда бірнеше сағаттық кептеліс пайда болды. Дем арасында болған оқиғаның мән-жайын әріптесім Бауыржан Жақсымбет айтып берсін.
Алматылықтар жер сілкінісі кезінде баспаналарынан жылдам шығуға асыққан. Осылайша, зәресі ұшқан жұрттың кейбірі далаға жеңіл киіммен, енді бірі аяғына ілінгенін сүйрете жүгірген. Теңселген үйден тезірек кетуге тырысқандардың әртүрлі фото видеолары әлеуметтік желіде тарады. Алғашқы толқыннан кейін тұрғын үйлердің аулалары халыққа толды.
Зілзаладан кейін зәресі ұшқан жұрттың басым бөлігі баспаналарына қайта оралғысы келмеген. Бірі күннің суығына қарамастан уақытты далада өткізсе, енді бірі көлігіне отырып тұрақта түнеп шықты. Сонымен бірге дүмпуден қашып қаланың сыртына қарай ағылған көлік санында есеп жоқ.
БАУЫРЖАН ЖАҚСЫМБЕТ, тілші:
- Алматы халқы уақытқа қарамастан қаладан шығып кетуге тырысып жатыр. Дәл қазір біз тұрған Райымбек даңғылының бойында бірнеше сағаттан бері ұзын-сонар кезек пайда болды. Ал баспанасынан жыраққа кеткісі келмеген жұрт таңға дейін автокөлікте күтеміз дейді.
САРАЛТЫМ МҰХАМБЕТӘЛИ, Алматы қаласының тұрғыны:
- Мен жер сілкінген кезде үйде болдым. Ең бірінші басым айналып жатырма деп ойладым. Бірақ, бөлмедегі заттардың барлығы орнынан жылжып, есік қайта-қайта қимылдағаннан кейін жер сілкініп жатқанын түсіндім.
ЭЛЬДАР БЕЙБІТҰЛЫ, Алматы қаласының тұрғыны:
- Бас айналу болды. Бүкіл адамдар біресе былай айтады, біресе былай айтады. Ең бастысы Алла тағала жеңілдігін берсін. Енді таңға дейін отырасыздар ма осында? Көреміз енді бұйырғанын.
Жер сілкінісінен кейін ресми органдардан бірден ақпарат берілмеді. Сондықтан әлеуметтік желі арқылы әртүрлі алып-қашпа әңгімелер тарап, қорқып жүрген көпшілік не істерін білмей абдырды. Ал, кейбір тұрғындар бірден эвакуациялық орталыққа қарай бет алып, таңды сол жерден қарсы алды.
ЛАРИСА БРОНИКОВА, Алматы қаласының тұрғыны:
- Мен төсектің қимылынан ояндым. Бірден жан-жағыма қарасам барлығы қимылдап тұр. Алтыншы қабатта тұрамын. Қатты қорқып осында келдім.
ЖЕҢІСКҮЛ САТАЕВА, 181 жалпы білім беретін мектеп директоры:
- Қазіргі таңда мыңнан астам адам мектепке келді. Тағы да келіп жатыр. Оның үстіне бірінші этажда осы спортзалдан бөлек бірінші этаждағы барлық кабинеттерді ашып қойдық.
Түн жарымда жақынының үйінде жетуді көздеген кейбір тұрғындар такси шақырып көруге оқталған. Алайда, мобильді қосымша арқылы тасымал қызметін ұсынған жүргізушілер қаланың сыртына апару үшін қомақты сома сұраған. Әр сәттен пайда тапқысы келетіндердің мұндай пиғылы әлеуметтік желі тұрғындарының әбден ашуына тиген. Ал, дереу арада мегаполис аумағынан кетуді көздеген жүргізушілерден жанармай бекеттерінде кезек тізілген. Бірнеше сағат бойы дүрбелеңге айналған қала аумағы таң ата қалыпқа түсе бастады.
Бізді әлеуметтік желіде оқыңыздар:
Информбюро 31 / @informburo31kanal
Informburo kz / @informburokz2022
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#Информбюро #31арна #Жаңалықтар #БастыЖаңалықтар #Нашиновости #Сегодня #Қазақстан #31канал