Рет қаралды 175,239
#Milarepa #Zhenphen
༈ རྣལ་འབྱོར་མི་ལ་རས་པའི་རྟེན་འབྲེལ་སྙིང་པོའི་མགུར་གླུ་བཞུགས་སོ། The Song Of - Essence Of Dependent Origination.
༄༅། །ལྷོ་བྲག་མར་པའི་ཞབས་ལ་འདུད།།
སྤྲང་རི་ཁྲོད་ཟིན་པར་བྱིན་གྱིས་རློབས།།
ཡོན་བདག་བཟང་པོའི་ཚོགས་གསོག་ལ།།
དོན་གཉིས་འགྲུབ་པའི་རྟེན་འབྲེལ་འགྲིག།
རྙེད་དཀའ་འཇིག་སླའི་ལུས་པོ་འདི།།
ཟས་དང་ཕྲད་པས་སྐུ་ཁམས་བཟང་།།
དོག་མོ་ས་ཡི་རྩི་བཅུད་དང་།།
དགུང་སྔོན་དབྱིངས་ཀྱི་སྦྲང་ཆར་གཉིས།།
འགྲོ་ལ་ཕན་པའི་རྟེན་འབྲེལ་ཡིན།།
རྟེན་འབྲེལ་གྱི་སྙིང་པོ་ལྷ་ཆོས་ཡིན།།
ཕ་མས་གསོས་པའི་སྒྱུ་ལུས་དང་།།
བླ་མ་དམ་པའི་གདམས་ངག་གཉིས།།
ལྷ་ཆོས་བྱེད་པའི་རྟེན་འབྲེལ་ཡིན།།
རྟེན་འབྲེལ་གྱི་སྙིང་པོ་སྙིང་རུས་ཡིན།།
མི་མེད་ལུང་པའི་བྲག་ཕུག་དང་།།
ཁ་ཞེ་མེད་པའི་དགེ་སྦྱོར་གཉིས།།
ཅི་བསམས་འགྲུབ་པའི་རྟེན་འབྲེལ་ཡིན།།
རྟེན་འབྲེལ་གྱི་སྙིང་པོ་སྟོང་ཉིད་ཡིན།།
མི་ལ་རས་པའི་སྒོམ་བསྲན་དང་།།
ཁམས་གསུམ་སེམས་ཅན་དད་པ་གཉིས།།
འགྲོ་དོན་འབྱུང་བའི་རྟེན་འབྲེལ་ཡིན།།
རྟེན་འབྲེལ་གྱི་སྙིང་པོ་སྙིང་རྗེ་ཡིན།།
བྲག་ལ་སྒོམ་པའི་སྒོམ་ཆེན་དང་།།
འཚོ་བ་སྦྱོར་བའི་ཡོན་བདག་གཉིས།།
སངས་མཉམ་པོར་རྒྱ་བའི་རྟེན་འབྲེལ་ཡིན།།
རྟེན་འབྲེལ་གྱི་སྙིང་པོ་བསྔོ་བ་ཡིན།།
བླ་མ་བཟང་པོའི་ཐུགས་རྗེ་དང་།།
སློབ་མ་བཟང་པོའི་སྒོམ་བསྲན་གཉིས།།
བསྟན་པ་འཛིན་པའི་རྟེན་འབྲེལ་ཡིན།།
རྟེན་འབྲེལ་གྱི་སྙིང་པོ་དམ་ཚིག་ཡིན།།
བྱིན་རླབས་མྱུར་པོའི་དབང་བསྐུར་དང་།།
དད་གུས་དྲག་པོའི་གསོལ་འདེབས་གཉིས།།
མྱུར་དུ་མཇལ་བའི་རྟེན་འབྲེལ་ཡིན།།
རྟེན་འབྲེལ་གྱི་སྙིང་པོ་བཀྲ་ཤིས་ཡིན།།
རྗེ་མི་བསྐྱོད་ཀྱི་ངོ་བོ་རྡོ་རྗེ་འཆང་།།
སྤྲང་པོའི་སྐྱིད་སྡུག་ཁྱེད་རང་མཁྱེན།། །།
Your support and appreciation would be very helpful to me 😊🙏.
THANK YOU 🙏