Рет қаралды 80,603
Оддий ўзбеклар у ёқда турсин, ўзбек зиёлилари Конституция ва қонунларимизни қанчалик даражада билади? Умуман қонучилигимиздан хабаримиз борми?!
Ҳуқуқий ва сиёсий жиҳатдан саводсизлигимиз етмагандек, 999-чи пробали содда ҳаммиз.
“Соддалик ярим гуноҳдир” - дейишган ота-боболаримиз. Соддалигимиз, ишонувчанлигимиз ва лақмалигимиз бизга ҳеч қачон муваффақият олиб келмаган. Фақат кулфат олиб келган.
Мана, чет элларда қочқинликда юрган қанчадан қанча ўзбек оҳирги уч-тўрт йилда президент Шавкат Мирзиёевнинг бир оғиз: “Юртга қайтинглар! Қўли қонга ботмаганларни қамамаймиз” - деган гапларига ишониб, Ўзбекистонга қайтишди. Бу лақмаларнинг аксарияти аэропортнинг ўзидаёқ қамоққа олиндилар, судландилар ва узоқ йилларга озодликдан маҳрум этилдилар.
Нима учун мен уларни лақмалар, деяпман? Чунки фақат лақма одам президентнинг юридик кучга эга бўлмаган бир нутқига ишониб, юртига қайтади. Устингдан очилган жиноий иш ёпилгани ҳақида на терговнинг, на прокуратуранинг, на суднинг қарори чиқмаган бўлса, бу ҳақида амнистия ҳам эълон қилинмаган бўлса, нега қайтиб келасан?!
Нима эмиш, президент телевизорда кўрсатилган нутқида айтибдимиш!
Азиз ватандошлар!
Билиб қўйинглар, президентнинг нутқи қонун кучига эга эмас. Агар президент шу нутқидан кейин илгари очилган жиноий ишларни ёпиш ҳақида тегишли қарор чиқарса эди, бошқа гап эди. Лекин ундай қарор чиқмади-ку!
Қонунларни билмасангиз ҳам, сал мантиқни, бош чаноғининг ичидаги ёнғоққа ўхшаш нарсани ишлатинглар-да! Лақмалик ҳам эви билан-да!
Конституция ва қонунларда ёзилган ҳақ-ҳуқуқларингизни танинг. Уларни талаб қилишдан қўрқманг!
ДХХчини, милисани ёки прокурорни кўрганда қўрқманг. Қалтироқ тиззаларингизга айтинг, қалтирамасин! Чунки бу жаллодлар одамнинг қўрққанини сезишса: “Ҳааа, демак бунинг бир айби бор!” - деб ўйлаб, сизни баттар исканжага олишади.
Билиб қўйинг: ДХХ, Ички ишлар вазирлиги ёки прокуратурадаги ҳар бир жаллод яхши психолог бўлади. Улардан қанчалик қўрқсангиз, улар шунчалик бўйнингизга айб илишга ҳаракат қилишади. Улардан қанчалик қўрқмасангиз, улар сизни шунчалик айбсиз экан деб ўйлашади.
Илтимос, бу кўрсатувни иложи борича кўп ватандошларга тарқатинглар. Юртдошларимиз мана шундай ёмон ҳолатларга сал бўлса ҳам тайёр турсинлар!
Фактларни ўрганинг ва фикр қилинг!
Бобомурод Абдулла
2021 йил 3 май