12 سر لحل عقدة الرياضيات يخفيها عنك المتفوقون لكي لا تسبقهم 🤫 📏📐 🔢

الماط خالق ليك عقدة فحياتك، و كا تلقا صعوبة باش تفهمو، فهاد الفيديو غادي نبارتاجي معاك 12 لسر غا يخليوك تفهم الرياضيات واخا تكُون فهامتك تقيلة، بشرط أنك تكمل الفيديو حتى للأخير لأن المعلومات مترابطة مع بعضياتها، و إذا فاتك غير نويطة وحدة غادي ضرب كولشي فالزيرو،
لي مزال ما شافش الجُزء الأول لحل عقدة الرياضيات ها هو الرابط ديالو :
• ثلاث نصائح ذهبية لحل ع... 👉
بلايليست أسرار التفوق الدراسي و الجامعي :
• ثلاث نصائح ذهبية لحل ع...
1- قرا الماط من الجذر ديالو :
ما يمكنش تبني الدار إذا ما حفرتيش ليها الساس، و كذلك الرياضيات ما يمكنش ليك تفهم الحوايج الكبار إذا ما ضبطتيش الحوايج الصغار، بحال العافية ملي كا تبغي تشعلها، ما غاديش تجيب عُود كبير، و لكن خاصك تجيب عويدات صغار، و هادشي علاش نقدر نضمن ليك أن السبب لي خلاك واحل فالماط ديال الكاطريام هو أنك مزال ما ضبطتيش الماط ديال الابتدائي و الأولى إعدادي.
كذلك السبب لي خلاك واحل فالماط ديال الباك هو أنك ما عندكش الساس ديال الماط لي قريتي فالإعدادي و هكذا ...
الماط علم متاربط مع بعضو، و كل قاعدة بسيطة كا تعلمها فيه كا توسع ليك الإدراك باش تفهم حوايج صعاب. و هادشي علاش ضروري دوز معايا للسر رقم 2 و لي هو :
2- ما دوز للخطوة 2 حتى تضبط الخطوة 1 :
ملي تبغي تحل شي تمرين فالرياضيات مثلا فيه 5 ديال الأسئلة متاربطة مع بعضياتها، ما تقُولش بغيت نحل التمرين، و لكن قُل : بغيت نحل فقط السؤال الأول حتى نفهمو مزيان عاد ندوز ل 2 ، و ما تتسوقش للوقت، واخا تشوف أن سؤال واحد خدا ليك ساعتاين من التفكير فالحل، كُن متأكد أنهُ كلما عطيتي الوقت + الخاطر + التركيز للسؤال الأول، كلما غا يسهال عليك السؤال الثاني، حتى غا تلقا راسك مع مرور الزمن عندك قدرة رهيبة فأنك تحل المسائل بسرعة.
هاد السرعة أو خفة البديهة فحال التمارين ما غادي توصل ليها حتى تكُون دوزتي السطاج ديال البطئ.
غا تلاحظ أنك فالأول كنتي كا تخرج التمرين فساعة، التمرين لي من موراه غا تولي تخرجو فنص ساعة، نتا كا تريني و نتا كا تزيد تطور الخفة ديالك فحل المسائل.
بحال هاد المكعب السحري، فاش أول مرة شريتو كنت كا نحلو فساعة، و مع التداريب اليومية وليت و لله الحمد قادر نحلو فدقيقة، و حاليا داير هدف أنني نحلو ف30 ثانية.
3- بالدوام قطرة دالما كا تهرس الرخام :
الرياضيات داير بحال شي عضلة، كلما خدمتيها كلما قويتيها، و كلما هملتيها كلما ضعافت، و هادشي علاش أهم حاجة لأي واحد بغا يتفوق فالرياضيات هي : التداريب اليومية، ماشي غير تحس براسك فهمتي الدرس تحبس، و لكن مباشرة دوز للتمارين، و ماشي تاني غير تشوف راسك خدمتي التمارين دالكتاب المدرسي كاملين تقول صافي وصلت، دوز لتمارين الإمتحانات السابقة، و ما عمرك تقُول ساليت حتى لليلة الإمتحان عاد ديك الساعة رتاح و نعس مزيان باش دماغك يفكر مزيان وقيت الإمتحان.
4- نوع مصادر التعلم :
ما تكتافيش فقط بشرح الأستاذ و الكتاب المدرسي، تفرج فأساتذة أخرين فالأنترنت كا يشرحو الرياضيات بطريقة مبسطة، و أيضا قلب على كُتب ديال الرياضيات خارج المقرر الدراسي، باش هاكذا كا توسع المعرفة ديالك و أي تمرين تحط ليك كا تلقاك ديجا دازت قدام عينيك النويطة لي غا تخليك تخرجو.
5- الذكاء هو طرح الأسئلة الغبية :
وي دُوك الأسئلة لي ملي كا تطرحهوم على الأستاذ كا يبداو يضحكو عليك او يتنمرو عليك صحابك، هُوما الأسئلة لي كاي يصنعُو العُلماء، و هادشي علاش ما عمرك تحشم أنك تطرح السؤال مهما كان كا يبان غبي للآخرين، و واخا يقمعك الأستاذ ديالك دير هدفك هو تفهم، و إذا ما جاوبكش قلب فبلاصة أخرى حتى تلقا الجواب ديالو، ماكاينش سؤال غبي، الغباء هو تحشم من طرح الأسئلة.
6- سقط الماط على الحياة اليومية :
أي حاجة قريتيها فالماط حاول تسقطها على الحياة اليومية ديالك و ديما بدا تسول راسك فين يمكن ليا نطبقها ؟
أو شي طريقة لي نقدر نشدها بيها ؟
مثلا المعادلة التالية :
2x + 4 = 10
حاول تسقط x على حياتك اليومية و تقُول مثلا شحال ديال الفلوس خاص يكون عندي الدوبل ديالهُوم و نزيد عليهوم 4 دراهم و نجمع عشرة ديال الدراه ؟
هنا دماغك إذا قلتي ليه x كا تجيه غريبة عليه، و لكن إذا قربتي ليه الفهم بالدرهم كا يقدر يتخيل و يستوعب المشكل و بالتالي كا تجيه ساهلة يلقا الحل ديالو، هنا كا تلقا الجواب هو 3 دراهم، إذا كان عندك الدوبل ديالها لي هو 6 دراهم و زدتي ليها 4 دراهم غا تكمل 10 .
هاد المعادلة لي تقدر تبان ليك نتا بطاطا و تافهة، تيق بيا أن شحال من واحد كا تلقاه غير حافظ الطريقة، و ما فاهمش العمق ديالها.
كا تقُول ليه حلها ليا كا يقُول ليك ساهلة ماهلة :
كا نردو الربعة لهاد الجيهة كا تولي ناقص ربعة، و كا نردو الجوج لهاد الجيهة كا تولي 6 مقسومة على جوج، و ها حنا لقينا الحل أ المكلخ، و لكن هدا، أتحداك أ سي العبقري تشرح ليا علاش الربعة ملي كان ردوها للجهة الأخرى كا تولي سالبة ؟ هاااا هنا حارو العُولاما، إيوا شرح ليا أ سي الفاهيم ؟
هُنا وقف حمار الشيخ في العقبة.
تقنية إسقاط الرياضيات على الحياة اليومية غا يخليك تفهم المعادلات من الدرجة الأولى بعُمق باستخدام الطريقة التالية :