FRETILIN 2.500 Husu CCF Konvoka Kongresu Nasionál Estraordináriu

Hatutan.com, (31 Janeiru 2024), Díli- Militante partidu FRETILIN hamutuk na’in-2.500, Kuarta (31/01/2024), submete karta petisaun bá Komité Sentral FRETILIN (CCF) hodi husu konvoka Kongresu Nasionál Estraordináriu (KNE) no halo Eleisaun direita bá Prezidente no Sekretáriu Jerál partidu istóriku ne’e.
Agustinho Sequeira “Somotxo” reprezenta militante FRETILIN 2.500 entrega petisaun bá Sekretáriu CCF, Kuarta (31/01/2024). Foto/Elio dos Santos da Costa
Petisionáriu nu’udár militanten FRETILIN na’in-2.500 ne’ebé hatama petisaun bá CCF, e mai husi Munisípiu Baucau, Lautem, Viqueque, Manatuto, Manufahi, Ainaro, Covalima, Aileu, Ermera, Bobonaro, Liquiça, Díli ho Rejiaun Administrativu Espesial Oe-Cusse Ambeno.
Iha petisaun ne’e petisionáriu sira maioria husu atu halo kongresu nasional estraordináriu tamba konsidera estrutura atuál liu-liu Prezidente FRETILIN, Francisco Guterres “Lú Olo” no Sekretáriu Jerál Mari Alkatiri, la hatudu dezempeñu eleitorál di’ak no lori insusesu bá partidu tamba iha estrutura atuál nia lideransa sempre lori derrota ba partidu iha eleisaun prezidensiál 2021 no eleisaun parlamentár 2023.
Porta vós Petisionáriu militante FRETILIN nian, José Agustinho Sequeira “Somotxo” hateten, militante no kuadru partidu FRETILIN, ne’ebé asina dokumentu ida ne’e, ho bazé bá direitu atu “livremente esprime ninia opiniaun no aprezenta bá respetivu órgaun sira, kritika, opiniaun no proposta kona-bá organizasaun no atividade FRETILIN nian’ (alínea d, artigo 139, Estatutos da FRETILIN).
ADVERTISEMENT
Hakarak hato’o petisaun bá Prezidente Francisco Guterres “Lú Olo”, ho Mari Alkatiri no membru CCF sira, ho konteúdu hanesan tuir mai;
Ho néon nakraik no laran susar, ami lamenta tebes rezultadu eleisaun parlamentár 21 fulan-Maiu 2023, ne’ebé hatudu katak FRETILIN lakon, ka ho lia fuan seluk, hetan derrota Eleitorál ida a’at-liu, iha istória pós-restaurasaun independénsia, ne’ebé halo militante no kuadru barak ninia fuan-moras, no lakon liu-tan esperansa ba lideransa atuál ninia kapasidade, atu lori Partidu Istóriku iha ne’e bá vitória eleitorál iha eleisaun sira tuir mai.
Petisionasriu sira militante FRETILIN nota katak, husi votu ho 57,37% (55 kadeira iha Asembleia Konstituinte) ne’ebé FRETILIN hetan, iha eleisaun tinan 2001, tanbá méritu Istóriku husi prosesu Libertasaun Pátria, iha sorin ida, maski númeru eleitór iha Timor-Leste aumenta 99,2% husi tinan 2001 ba tinan 2023, ho lideransa Prezidente Lu 0lo, no Sekretáriu Jerál Mari Alkatiri, FRETILIN ninia votu tu’un hela de’it iha tinan 20 nia laran, nunka rekupera bá fali rezultadu ne’ebé hetan iha eleisaun tinan 2001.
Halo konférensia imprensa hafoin entregra petisaun bá sekretáriu CCF. Foto/Elio dos Santos da Costa
Sira dehan, aat-liu tan, tu’un to’o 25,75%, ka ekivalente de’it ho kadeira 19 iha eleisaun 21 fulan-Maiu 2023 (bele haree dadus kona-ba rezultadu eleisaun parlamentár husi 2001 to’o 2023, iha Anexo 1 no Anexo 3).
“Iha sorin seluk, ho lideransa Prezidente kamarada Francisco Guterres Lu Olo, no Sekretáriu Jerál, kamarada Mari Alkatiri, bainhira FRETILIN manan mós, la ukun ka ukun tiha mós adversáriu polítiku sira hamonu hikas (hanesan iha eleisaun 2007, no eleisaun 2017), uainhira lakon, halo insidénsia parlamentár, no viabiliza (hanesan iha eleisaun 2012, no Eleisaun 2018), hafoin, maski viabiliza tiha bá mos, bainhira bá eleisaun, lakon aat liu tan, hanesan iha eleisaun parlamentár 2023,” Agustinho Sequeira “Somotxo” haktuir.
Somotxo argumenta iha rezultadu eleisaun sira ne’ebé iha, a’at-liu tan, Munisípiu Baucau, Lautem ho Viqueque ne’ebé tradidionalmente FRETILIN sempre manan ho mínimu 50%, iha eleisaun 21 fulan-Maiu 2023, hetan redusaun votu entre 8% to’o 16% kompara ho rezultadu eleisaun antesipada 2018 (bele haree dadus ne’ebé kompara rezultadu iha munisípiu 3)
ADVERTISEMENT
Maski dezempeñu eleitorál la satisfatóriu hanesan temi iha leten, Lideransa Partidu argumenta katak dezempeñu eleitorál ne’e responsabilidade koletiva Partido nian, no labele fó sala ba de’it lideransa partidu.