Рет қаралды 297
چهل و چهار سال ایجایی بوگذشت.
فهیمه خانم و من، چان به چان، زندگی بوکودیم. ششم تیرماه یکهزار و سیصد و پنجاه و نه، تا هسا.
هرتا زوج مانستان، امی زندگانی بیجیر بوجور داشتی. امی مملکت مانستان. امی دونیا مانستان. هچین خانی هه دیروز بو کی حنابندان بیگیفتیم و ساده لباس دوکودیم. فردایش هم عروسی. می دامادی لیباس هنه کی تماشا فرماییدی. فهیمه خانم هم خو عروسی لیباسا به کومک می خاخور و خودشه خاخور بودوخته. او سالانه ره ویشتره عروسیان هطو بو. هنوز تالار و سالن داب نوبوسته بو. چسان فیسان و فوکون فیشان کم بو. فهیمه خانم خاخوره خانه عروسی بیگیفتیم. بعضی عروسیان هم کوچه و همساده خانه میان، مهمانانا پذیرا بید. فیلمبرداری، چندان داب نوبو. امی رفیق، مهندس #مهدی_رئیس_سمیعی کی الان دوکتور و استاد دانشگایه، می دوربین فیلمبرداری امره فیلم بیگیفت. ده دقه فیلم، کی شوما چند ثانیه، تماشا کوداندریدی. نه الان مانستان کی سه ساعت فیلم چاکونیدی یو عروسی بوبوسته لوکیشنه فیلمبرداری جرگه یو ویشتره مراسم، فیلم گیفتنه واسی، انجام بئه. چندر هزینه بئه. قرضه قوروض گاگلف، آسمانه لچه سر فارسه کی کمرشکنه. راستی ترانهای کی فیلم میان ایشتاویدی، استاد عاشورپوره شینه کی بخوانده بوم.
#پرویزفکرآزاد