Рет қаралды 752
怪誕二部曲 走入柳式搞怪靈界
Jer聲音導航
柳應廷Jer繼以怪誕風格嘅《筆觸男孩憂鬱之死》後,推出今年第二首派台作品《約齊靈魂在墳墓開生日派對》,並延續怪誕風格,繼續以鬼才大師Tim Burton主題融入作品中,並劇透「怪誕系列」將有第三部曲。
既然今次再度以三部曲鋪陳整個音樂故事,Jer話當然3首歌係有所關連:「其實《筆觸男孩憂鬱之死》及《約齊靈魂在墳墓開生日派對》都埋藏咗一啲伏筆,希望聽眾可以跟住歌曲慢慢走向故事Ending,就會搵到呢3首歌其實係講咩,大家可以嘗試自己搵出嚟。」
是次新歌找來首度合作的馮允謙作曲,並由周耀輝填詞。Jer表示期待合作以久:「特別是Jay Fung,自己搵咗佢好耐,一直都好期待同佢合作會係點,因為佢寫嘅旋律都係好挑戰性。我特登搵佢寫,佢一口就應承咗,一寫出嚟個Melody都冇乜點樣改過,已經代入到故事,幻想係一班瞓著咗嘅人發緊惡夢,第一次聽Demo已經有呢個畫面,所以沿住惡夢夢境,gather暗黑靈魂做一啲嘢。」
Jer以自己感受與周耀輝分享,希望在歌曲中表達。「我有講過例如大家覺得惡夢係一件唔好嘅事,發緊惡夢你會好驚,但其實某程度上潛意式醒返之後你會克服咗啲嘢,我唔想令到大家覺得發完個夢就淨係驚,要有啲得著,可以成就到而家嘅自己。一班靈魂一起唱歌,慶祝生日派對,這個完全不覺得驚嚇的畫面,就出現在《約齊靈魂在墳墓開生日派對》。」
今年Jer再度以三部曲分享佢嘅音樂世界,以玩味風格創造出「怪誕系列」。Jer說:「《約齊靈魂在墳墓開生日派對》係我今年比較玩味嘅一個project裡面,一首比較重型嘅歌曲,上首有少少funky得嚟再會有少少brass,今次新歌嘅好玩之處,在於歌詞帶聽眾進入一個靈魂嘅世界,聽嘅時候要代入成個故事,由副歌開始見到嘅『螞蟻腦』、『人皮遺囑』,相信都係大家未必見過嘅事物,但全部都係喺我個腦嘅幻想空間裡面。」
上一首作品,Jer已表示自小熱愛Tim Burton的電影及創作,所以第二部曲繼續加入Tim Burton式搞怪、黑色幽默及荒誕。「怪誕得來又有少少暗黑嘅元素,同《筆觸男孩憂鬱之死》分別在於節奏感比較重,會聽到鼓聲,Powerful啲,相信之後Live performance上會比較多敲擊嘅元素。」
而今次造型照亦繼續搞怪風格。「單曲封面用咗一個比較日系武士妝。坊間多數歌手嘅Cover都係乾淨俐落靚仔,既然今年玩玩味,不如玩盡啲,妝容上都做個突破啲,希望大家望到呢個樣就諗到呢首歌,所以造型上今次妝容,就係發惡夢嗰個人嘅感覺。」
至於MV則仍未拍攝,但對於MV概念,Jer已有很多鬼主義:「例如係一位婆婆身處幼稚園場景會係點呢?造型上我覺得要有型,以往嘅怪誕係有少少古怪加開心感覺,今次要喺個妝上面有少少型格,暫時未拍,但幻想會係發緊惡夢嘅惡魔!」
#jerlau柳應廷 #JerLau #柳應廷 #筆觸男孩憂鬱之死 #約齊靈魂在墳墓開生日派對 #怪誕三部曲 #怪誕系列 #柳柳粉 #mirrorweare