Рет қаралды 3,450
Coğrafi obyektlərin yeri xəritələrə əsasən təyin edilir. Yəqin ki, hər biriniz xəritənin nə olduğunu bilirsiniz. Biz xəritələr vasitəsilə müxtəlif coğrafi obyektlər
- dağ, dərə, çay, dəniz, okean, materik və adalar, ölkələr və şəhərlərin yeri haqqında məlumat alırıq.
Adətən, xəritələrdə coğrafi obyektlər kiçildilərək verilir. Buna görə də bütün obyektləri xəritələrdə göstərmək mümkün deyil. Xəritələr müxtəlif məzmunda ola bilər. Məsələn, bütün dünyanın xəritəsi, materiklərin və okeanların xəritəsi, ölkələrin və onların hansısa bir hissəsinin xəritəsi var. Təbii zonaların da təsvir edildiyi xüsusi xəritələr hazırlanır. Xəritə əsasında biz Azərbaycanın quruda 5 dövlətlə - Rusiya, Gürcüstan, Ermənistan, Türkiyə və İranla həmsərhəd olduğunu müəyyən edə bilərik.
Xəritəyə baxdıqda Azərbaycanın dünyanın ən böyük gölü olan Xəzər dənizinin sahilində yerləşdiyi, ölkəmizin dənizdən Qazaxıstan, Türkmənistan və Rusiya ilə həmsərhəd olduğu görünür. Xəritələrdən inşaat işləri aparılarkən, yollar və kanallar çəkilərkən istifadə olunur. Xəritələr vətəni qoruyan hərbçilərimiz üçün də əvəzolunmazdır. Hazırda kosmosdan çəkilən foto şəkillərin köməyi ilə daha dəqiq xəritələr hazırlanır.