Хадан нэһилиэгин 125 сыллаах үбүлүөйдээх ыһыаҕа

Ыһыах - сахалар Саҥа дьылбыт. Этэҥҥэ өссө биир хаары уулларан, төгүрүк сылы түмүктээн, саҥа күөххэ үктэнэр бырааһынньыкпыт. Саха сирин бары муннугар дьон саамал кымыс утахтаах, сылгы этэ сэмсэлээх, ырыа-тойук түһүлгэлээх, саха төрүт оонньуулаах ыһыах ыһар. Былыр-былыргыттан саха дьоно ыһыахха дьиэ кэргэнинэн киирэн түһүлгэлиир үгэстээхтэр - оҕолуун-уруулуун, кыралыын-улаханныын бары мусталлар. Ол курдук өбүгэлэрбит төрүт үгэстэрин тутуһан от ыйын 1 күнүгэр Куомарыкы тупсаҕай кэриитигэр, сибэкки курдук симэнэн, кустук курдук киэргэнэн Хадан нэһилиэгэр Уйгулаах ыһыах ыһылынна. Нэһилиэкпит төрүттэммитэ 125 үбүлүөйдээх сылыгар тэрээһин саҥардыллыбыт пааркаҕа буолла. Саҥа павильоннар, саҥа хорчуоппалар.... Киирэр аартык тупсаҕай көрүҥэ барыбыт сүргэбитин көтөхтө. Айылҕабыт барахсан күнүн көрөн чаҕылыйан туран биэрдэ, үөрүүбүтүн үллэһиннэ. Олохтоохтор уонна ыалдьыттар аартыгынан чуорааннары тыаһатан киирдилэр. Ыытыллар тэрээһиннэргэ олохтоохтор, ыалдьыттар көхтөөхтүк кытыннылар.
Сарсыарда 11 чаастан Үрүҥ тунах ыһыах үөрүүлээх быһыынан- майгынан арылынна. Нэһилиэк баһылыга Андрей Николаевич кэргэнинээн, нэһилиэх олохтоохторун уонна ыалдьыттарын параадын иилээн-саҕалаан түһүлгэҕэ киллэрдэ. Кинилэри түптэһиттэр алгыстаах буруоннан ыраастаан көрүстүлэр.
Битииһиттэр тахсан алгысчыт суолун ыраастаан алгысчыты ыҥырдылар. Алгысчытынан быйыл Илимнииртэн Татьяна Ильинична Игнатьева буолла. Алгыс ылынан дьиҥ-чахчы айылҕалыын, Үрдүк Айыылардыын алтыспыт, күүс- уох ылыммыт, сэниэ эбиммит курдук бары да сананныбыт. Бар дьоммут, ыһыахпыт ытык - мааны ыалдьыттара, өбүгэбит үгэстэринэн олоҕуран ыраастаннылар, арчыланнылар, үөһээ үрдүк Айыылартан үөттэриилээх, орто дойду улууларыттан уһуйтарыылаах Улуу киһибит - Кыыл Уола үрүҥ күҥҥэ дайыппыт “ТОҔУС МЭҤЭ ХАМСАНЫЫТЫН” биир ситим буолан тоҕуоруччу туттулар, алгыс күүһүн чиҥэттилэр! Аал уоту оттон, Алгыс тылын этэн, Үрдүк Айыыларга сүгүрүйэн туран, самаан сайыммыт салаллыытын уруйдуу нэһилиэкпит олохтоохторун уонна ыалдьыттарын алгыстаах алаадьыннан, хойуу кымыһынан, үтэһэлээх этинэн айах туттубут.
Нэһилиэкпит баһылыга Андрей Николаевич Оконешников үөрүүлээх быһыыга майгыга «Хадан нэһилиэгин сайдыытыгар кылаатын иһин”, “ Хадан бочуоттаах олохтооҕо” бэлиэлэри, “Саха Өрөспүүбүлүкэтигэр физкультурнай хамсааһын 100 сылынан” эҕэрдэ суруктары, “Сунтаар улууһун тыа хаһаайыстыбата сайдыытыгар кылаатын иһин” бочуотунай бэлиэ туттартаата. Сунтаар улууһун үөрэҕитиитин салайааччыта Иванов Альберт Ионович “Сунтаар улууһугар физическай култуура уонна успуорт сайдыытыгар кылаатын иһин” бочуотааах бэлиэ, ону тэҥэ “Сунтаар улууһун үрүҥ көмүс” түөскэ кэтиллэр бэлиэ уонна Бочуотунай грамота туттарда. Саха Өрөспүүбүлүкэтин быыбарнай хамыыһыйатын бочуоттаах грамотатын Татьяна Афанасьевна Никитина ылан үөрүүтэ үксээтэ. Быйыл 50 сыл бииргэ олорбут ыалларбытыгар Эдуард Романович, Гузалия Наггимуловна Степановтарга Ил Дархан уонна Сунтаар улууһун Аҕа баһылыгын эҕэрдэ суруктарын туттардылар. Попова Ульяна Дмитриевна Сунтаар улууһун депутаттарын Сэбиэтин Председателэ Үрүҥ тунах ыһыаҕынан эҕэрдэлээн туран, Неустроева Людмила Титовнаҕа, Лидия Авдеевна Архиповаҕа, Васильева Людмила Дмитриевнаҕа “Сунтаар улууһун социальнай-экономическай сайдыытыгар кылааттарын иһин” бочуоттаах грамоталары туттарда. Үрүҥ тунах арыллыы чааһа наҕараадаларынан түмүктэннэ.