Հայաստանի անկախության օրը Լոս Անջելեսի Սարյան մշակութային կենտրոնում

Սեպտեմբերի 21-ին Լոս Անջելեսի «Սարյան մշակութային կենտրոնում» նշվեց Հայաստանի անկախության օրը:
Հյուրերի թվում, հատկապես շատ էին այլազգիները, ովքեր եկել էին իրենց աջակցությունը հայտնելու հայ ժողովրդին և միասին նշելու, Հայաստանի անկախության օրը: Մուտքի մոտ հյուրերին դիմավորող հայկական տարազով պարմանուհիները և կենտրոնի դահլիճում հնչող «Կոմիտաս» կամերային խմբի ելույթը հայկական շունչ էր հաղորդել միջոցառմանը: Հանդիսավարներ Տաթևիկ Էքեզյանը և Արա Ղազարյանը օրվա կարևորությունը ընդգծելով հորդորեցին մասնակիցներին, սեպտեմբերի 21-ը ևս նշեն այնպես ինչպես նշում են ԱՄՆ անկախության տոնը: Միջոցառմանը ներկա հյուրերին ողջունեցին «Սարյան մշակութային կենտրոնի» հիմնադիր Աշոտ Գեղամյանը և Արմեն Բայբուրդյանը: Ելույթներով հանդես եկան հայազգի երաժիշտներ, անհատ կատարողներ: Կենտրոնի հիմնադիր Աշոտ Գեղամյանը նպատակ ուներ, որ անկախության օրվա առիթով կենտրոնում նաև հայ նկարիչների ցուցահանդես բացվի: Ընտրությունը մեծ էր: Որոշեց և անցավ գործի: Ընտրեց հայ երկու նկարիչների կտավները և ցուցահանդեսը անկախության օրվան պատրաստ էր: Հանդիսավոր մասի ավարտին հյուրերը ծանոթացան հայ գեղանկարիչներ Ռազմիկ Սամվելս Հաջիկեանի և Տիգրան Հովումյանի աշխատանքներին: Միջազգայի հարաբերությունների դոկտոր, դիվանագետ, արտակարգ եւ լիազոր դեսպան Արմեն Բայբուրդյանը կարևորեց, որ անկախության տոնը նշվում է Սարյան կենտրոնում, քանզի անկախությունը սերտորեն առնչվում է մշակույթի հետ :
«Անկախությունն է, որ ազգային ինքնության բարձրակետն է և այսր այս կենտրոնը սուրբ առաքելություն է ստանձնել, ոչ միայն պահպանել հայոց լեզուն, արվեստը այլ նաև զարգացնել» , alphanews-ի հետ զրույցում ասաց Բայբուրդյանը: