စာဥ နှင့် သာအေး အရှုပ်အရှင်း - ဂီတစာဆို ကိုခင်မောင်ဝင်း

ဂီတစာဆို ကိုခင်မောင်ဝင်းဟူသည် မြန်မာသံစဉ် တေးရေးဆရာတဦးဖြစ်ရုံသာမက ကက်ဆက်အသံဇာတ်လမ်းခေတ်တလျှောက်လုံး အသံဇာတ်ညွှန်း၊ ဇာတ်လမ်းများကို ရေးသားခဲ့သူ ဖြစ်သည်။
သူသည် ကက်ဆက်ဇာတ်လမ်းခေတ်တလျှောက် ချစ်တောင်ပြုံး၊ ချစ်ပုပ္ပါး၊ တောင်ပံနီလူကလေး၊ ပျဉ်းမငုတ်တို၊ ပေါက်ပင်ဘာကြောင့်ကိုင်းရတယ်၊ မောင်ဖေငယ်လို အချစ်မျိုး၊ ငယ်သူငယ်ချင်းစာဥ၊ သာအေးစသည့် ပရိသတ်အကြိုက်တွေ့ခဲ့သည့် ဇာတ်လမ်းတွဲများစွာကို ဖန်းတီးခဲ့သည်။ သူ၏ အသံဇာတ်လမ်း ဇာတ်ဝင်တေးများကို သူ ကိုယ်တိုင်ရေးစပ်သီကုံးခဲ့သည်။
ဒါသာမက ဂန္ထဝင်အဆိုတော်များဖြစ်ကြသည့် ဟင်္သာတထွန်းရင်၊ တွံတေးသိန်းတန်၊ မာမာအေး၊ အောင်သူတို့အတွက် တေးသီချင်းပေါင်းများစွာကိုလည်း ရေးစပ်ပေးခဲ့သည်။ ‘ချစ်ပုပ္ပား’တေးသီချင်းမှာ ဒီဘက်ခေတ် လူငယ်များ ပါးစပ်ဖျားအထိ ရောက်ရှိခဲ့သည့် ကိုခင်မောင်ဝင်း၏ ဂန္ထဝင်တေးလက်ရာတပုဒ် ဖြစ်သည်။
ဂီတစာဆို ကိုခင်မောင်ဝင်းသည် အသက် ၈၆ နှစ်အရွယ်ရှိပြီဖြစ်ကာ ရန်ကုန်မြို့၊ မင်္ဂလာဒုံမြို့နယ်၊ အနမ်းပင်ရပ်ကွက်တွင် မိသားစုနှင့်အတူ ဘဝကို ကျန်းမာအေးချမ်းစွာ ဖြတ်သန်းလျက်ရှိသည်။
ကိုခင်မောင်ဝင်းကို ၁၉၃၈ ခုနှစ် မေလ ၂၅ ရက်တွင် ရန်ကုန်တိုင်းဒေသကြီး၊ တိုက်ကြီးမြို့နယ်၊ အဖျောက်မြို့ (ယခင်အခေါ် ဧရာဝတီတိုင်း၊ ဇလွန်မြို့နယ်) တွင် မွေးဖွားခဲ့သည်။