Рет қаралды 8,566
رقم حجز الاستشارات والكورسات : ٠٠٢٠١١٥٠٥٨٦٠٥٢
هو ابويا النرجسي حيتحاسب عليا؟
شاب زي القمر عمره ١٧ سنة بسم الله ما شاء الله يفرح القلب ،بيخاف ربنا زيه زي معظم الشباب بيقطع في الصلاة لكن بيصلي وبيلجأ لربنا لما الدنيا تضيق بيه ، الولد مؤدب وقلبه نضيف وطبعا كلنا عارفين معاملة الاب النرجسي مش ححكي فيها لكن اللي خلاني اعمل الفيديو ان الولد سألني سؤال هزني ،الولد بيقول لي هو مش بيتأخر عليا في أي مصاريف فقلت له طيب لعل دة يخليك لما تقف ادام ربنا تقدر تسامحه ع اللي بيعمله فيك (كبش الفدا) قالولد سألني السؤال دة هو ربنا حيحاسبه عليا ؟ قلت يا حبيبي حضرب لك مثل وطبعا مفيش مقارنة انا مش بشبهك ابدا باللي حقوله بس دة اكتر مثل حيفهمك حق الابن على ابوه . هو انت لو اشتريت كلب بفلوسك يعني الكلب اصبح ملكك وانت اكلته وشربته بس حبسته وماخرجتوش ابدا في الشارع ومش بتطبطب عليه ولا بتكلمه ولا بتجيب له حتى كلب تاني يونسه الكلب حيحصل له ايه حيكتئب وممكن يموت بسبب الاكتئاب ودة حقيقي مش كلام ، طيب لو انت عملت كدة وانت عارف انك بتؤذي الكلب وانه ممكن يكتئب ويموت تفتكر ربنا حيحاسبك ولا لأ ،قال لي حيحاسبني طبعا ،قلت له طيب لما يكون ابنك وانتي الصبح وبالليل بتقرفه وتهينه وتؤلمه وممكن تضربه وتحبسه وترغمه يعمل اللي انت عايزه وهو ملوش أي حق في أي اختيار وانت بتكون مدرك انك بتعمل دة عشان تحس براحة نفسية طيب حتتحاسب على ابنك ولا هو الكلب اهم عند ربنا؟
المشكلة ان في الزمن اللي احنا فيه محدش عارف حقوقه الشرعية ولا حد عارف واجباته الشرعية . زي ما ربنا امرنا نبر الوالدين امر كمان الإباء انهم يبروا الأبناء بانهم يختاروا لهم أمهات صالحات وانهم يختاروا لهم أسماء ميمونة ومحبوبة وانهم ينفقوا عليهم وانهم يعدلوا بينهم ويربوهم على الدين الصحيح ويكونوا قدوة حسنة لهم وانهم يمنحوهم حقوقهم الأساسية واولها الحب الغير مشروط وهل النرجسي بيعمل أيا من الحقوق دي؟
طيب النرجسي وغير النرجسي حيتحاسب على أولاده لانهم امانة ومسئولية ولان الأبناء مش ملكية خاصة للاباء والامهات زي ما بعضنا بيتخيل ، ويقول ابني وانا حر فيه اعمل فيه اللي انا عايزه وخصوصا اللي بيتربى على ايد اهل بيكون دة فكرهم بيكتسب نفس الفكر ويطلع متخيل ان الأبناء دول ملكه ، لا الأبناء مش ملك لنا دول امانة ربنا استودعناها ولازم نحافظ عليها ونراعيها وننشئها بالشكل اللي ربنا عايزه .
طيب لما النرجسي مش بيبر أبناؤه وبيعذبهم وربنا حيحاسبه هل دة معناه اننا نهجره ونقاطعه؟
لا قطعا لا لانهجره ولا نقاطعه لكن نتعامل معاه بالحجر الرمادي ونديه فتات الخبز بنفس طريقة التعامل مع الزوج النرجسي بس هنا النية لازم تكون غير هنا النية لازم تكون لوجه الله نديه فتات خبز لقضاء احتياجه عشان خاطر ربنا بس مش عشان نتقي شره لان الابن ممكن يبعد ويتجوز واذى ابوه يقل مش زي الزوجة اللي ملهاش مفر الا الى الله ، فالابن والابنة يتعاملوا مع الإباء النرجسيين بالحسنى من عن بعد الا اذا الأذى فاق الحدود زي والعياذ بالله الاب المتحرش او الاب مدمن المخدرات اللي ممكن يعرض الأولاد للخطر فدة لازم المقاطعة الجسدية يعني نخلي السؤال عنه بالتليفون فقط واذا طبقنا عليهم احكام المنافقين فاظن حيكون فيه كلام تاني انا مش متخصصة فيه ،لكن احنا بنتكلم على اد معلوماتنا الأولاد اللي كبروا وفهموا ابوهم وامهم يقدروا يتعاملوا معاهم من بعيد بالحسنى اما الأطفال اللي لسة بنربيهم وخايفين يطلعوا نرجسيين او مرضى نفسيين فدول لابد من عزلهم عن الاب او الام النرجسيين لحمايتهم واسألوا الشيوخ في المسألة دي بس تشرحوا لهم الوضع صح. خصوصا اللي بيعلم أولاده الفسق والفجور واللي بيعلم أولاده عقوق امهم
اما بقى موضوع كره الأبناء للاباء حرام ولا لا عايزة أقول فيها جملة واحدة ، ان القلوب بين اصبعي الرحمن يقلبها كيف يشاء . الحب والكره مش بإيد حد القلب مش ملكك أصلا دة ملك لخالقه وهو اللي بيتحكم تحب مين وتكره مين فدي حاجة مش حتتحاسب عليها ماتخافش المهم لا تتعدى حدودك بسبب عدم الحب ولا تغضب ربك بسبب عدم الحب . ومن يتق الله يجعل له مخرجا ويرزقه من حيث لا يحتسب