Рет қаралды 251
ONE.COM.MT • It-Tnejn, fil-Parlament Malti, għaddiet b’mod unanimu l-Liġi dwar is-Saħħa u s-Sigurtà fuq il-post tax-xogħol, li tressqet mill-Ministru għall-Ġustizzja u r-Riforma fis-Settur tal-Kostruzzjoni, Jonathan Attard. Din il-liġi se tinkludi, fost l-oħrajn, aktar inforzar, permezz ta’ pieni aktar ħorox, biex jiġu salvagwardjati aħjar id-drittijiet tal-ħaddiema.
B’rabta ma’ dan, permezz ta’ post fuq il-pjattaforma soċjali X, il-Prim Ministru Robert Abela qal li din il-liġi se żżid aktar protezzjoni fuq il-ħaddiema, hekk kif kull ħaddiem jistħoqqlu li jiġi ttrattat b’dinjità.
Din il-liġi se toħloq sistema sigura ta’ saħħa u sigurtà fuq il-postijiet kollha tax-xogħol, mhux l-inqas dawk li jippreżentaw l-akbar riskji.
Il-liġi l-ġdida se tagħti aktar saħħa lill-Awtorità għas-Saħħa u s-Sigurtà Fuq il-Post tax-Xogħol, l-OHSA, waqt li se tintroduċi multi aktar ħorox għal min ma jimxix mar-regoli stabbiliti.
Din il-liġi se taħdem b’tali mod li min jinstab ħati fl-ewwel nuqqas se jkun espost għal multa li tvarja bejn elf u ħames mitt ewro u massimu ta’ ħamsin elf ewro, iżda, f’każi serji, hemm massimu ta’ sentejn priġunerija. Min isir riċediv u jinstab ħati darb’oħra fil-Qorti, il-minimu tal-multa jitla’ għal għoxrin elf ewro u l-piena ta’ priġunerija titla’ sa massimu ta’ erba’ snin.
Se jinħoloq ukoll tribunal b’ġurisdizzjoni f’dan il-qasam bil-ħsieb li jkun hemm sistema ġusta u li ma tħares lejn wiċċ ħadd.
Sadanittant, aktar kmieni, il-Kamra tal-Kummerċ, l-Intrapriża u l-Industrija qalet, fi stqarrija, li hi ripetutament sostniet fuq l-importanza li tingħata l-attenzjoni urġenti lis-saħħa u s-sigurtà fuq ix-xogħol biex jiġu evitati aċċidenti u mwiet.
Il-Kamra qalet li tilqa’ l-abbozz, li issa ġie approvat, u li biha l-awtoritajiet se jkollhom is-setgħa u d-dritt li jordnaw li jinħatar Health & Safety Reporting Officer b’rabta man-natura tax-xogħol, skont il-bżonn.
Il-Kamra tal-Kummerċ qalet li l-pass li jmiss hu li jiddaħħal inforzar proattiv, li jinkludi wkoll il-bdil ta’ informazzjoni pertinenti bejn id-dipartimenti tal-gvern, l-entitajiet, l-aġenziji u l-awtoritajiet biex ma jkunx hemm tkaxkir tas-saqajn.